Malua Sian Pangkangkungi (Lepas Sidi)

1. Pangaradeon.

Parhata Ni Suhut

Di hamu Amanta Raja dohot Inanta Soripada, Raja ni Dongan Tubu, Raja ni Boru dohot Bere, Raja ni Dongan Sahuta, dongan sahuria dohot Pangula ni huria, tarlumobi di hamu Raja ni Hula hulanami, ala nunga dapot tingkina, naeng mulaanta ma ulaonta, masuk ma hita tu jabu Rajanami. (Saboina dijouhon 2 hali) (Dung masuk sude Raja na ginokhon tu jabu, parhata ni suhut mangatur parhundul, jala didok ma):

Di hamu hasuhutonnami, hundul ma hamu di jabu bona an, Haha doli dohot dongan sahuta hundul ma hamu di siamun ni hasuhuton, Anggi doli dohot boru/ bere disiambirang ni hasuhuton. Di hamu Raja ni Hula hulanami, Hula hula tangkasnami, hundul ma hamu di uluan ni jabu on, masidompan dohot hasuhuton. Tulang rap dohot angka hula hula na asing, hundul ma hamu di siamun ni Hula hula tangkasnami, jala boru dohot pariban ni hula hula i, hundul ma di siambirang nasida.

2. Hata Huhuasi Sian Parhata Ni Suhut

Di hamu Amanta Raja dohot Inanta Soripada, Raja ni dongan tubu, Raja ni boru dohot bere, Raja ni dongan sahuta, dongan sahuria, nang dohot angka ale-ale, tarlumobi di hamu Raja ni hula hulanami. Hombar tu gokhon dohot jou jounami, mauliate godang ma hupasahat hami tu hamu di haradeonmuna, marnatampak hamu rap dohot Inanta Soripada, marneang ni langka hamu ro mangadopi ulaonta sadari on. Tangkas ma tutu paboaonnami, haroan marharoanan, sintuhu ni silas ni rohanta di ari na uli, ari na denggan on. Nasogot nunga manghatindanghon haporseaon anaknami si Botar di jolo ni Tuhanta, dohot di jolo ni huria i di gareja. (Adong deba mandok: malua sian panghangkungion manang lepas sidi). Goaron maibana naung mandiri di haporseaon, na patuduhon nunga manginjak dewasa ibana. Jadi gabe sada ruas ma ibana di huria i. Di silas ni rohanta i, Amang Raja, dohot hamu Inang Soripada, asa lehon hamu hata poda hata sipasingot, hata sigabe gabe dohot hata pasu-pasu nang dohot angka hata tangiang tu anaknami si Botar on, anggiat nian gabe saksi ni Kristus ibana, gabe anak na bisuk, anak na malo anak sipasangap natorasna tarlumobi sipasangap Tuhanta.

On pe di hamu Amang Raja, dohot hamu Inang Soripada tarlumobi di hamu uduran ni Hula hulanami, asa lehon hamu panuturion laho manguduti ulaon silas ni rohanta sadari on. Anggo eleknami nian, tarsongon on ma partording ni ulaonta. Parjolo me Hula hula tangkas dohot uduranna mangupa berena si Botaron dungi diuduti Tulang dohot uduranna. Dung sidung i, ro ma ham pasahathon na marniadopan ni sipanganon tu Hula hula i, baru pe marsipanganon hita. Tarsongoni ma usulnami Amang Raja. Beha pandapotmuna? Botima. (Loloan na marlas ni roha mangalusi). Na denggan angkup ni nauli.

3. Hata ni Hula hula tangkas tingki pasahat Upa-upa.

Mauliate ma tapasahat tu Tuhanta, na mangalehon ari na uli, an na denggan on di hita, ai boi si Botar on manghatindanghon haporseaonna di jolo ni Tuhanta, nang di jolo ni huria i, di gereja na sogot.

Di ho Boru hasian, dohot di hamu Amang Hela, di silas ni rohanta on, ro do hami Hula hulamuna laho pasahathon songon upa-upani pahompunami si Botar on, i ma marhite-hite dengke sitio-tio asa sai asi ma rohani Tuhanta, sai tio ma parsaulian, tio parhorasand pahompunami si Botar on. Dengke simudur-udur, asa sai rap marudur-udur hamu tu dolok tu toruan, jala sai masipaolo-oloan hamu dohot angka pahompunami i. Dengke saur, jala dengke sahat, asa sai saurma hita leleng mangolu, sahat tu parhorasan sahat tu panggabean. Botima.

4. Alus Natoras ni Na Malua

Ima tutu Amang, Inang! Sal dipasaut Tuhanta ma na uli, na denggan songon na nidokmuna i. Botima.

(Dung i masisalaman. Molo adong dope na naeng pasahathon dengke sitio-tio/kado sian uduran ni hula hula tangkas, langsung ma dipasahat, jala ndang pola be mandok hata, alai didok ma): Las ma roham pahompunghu manjalo dengke sitiotio/kado on. Sai Tuhan Debata ma na mandongani ho. Botima.

5. Hata ni Tulang ni Suhut tingki pasahat upa upa.

Di hamu Bere dohot di hamu Boru hasian, tarlumobi di ho pahompunghu si Botar. Mandok mauliate ma hita tu Tuhanta, ala asini roha-Na boi marlas ni roha hita, i ma siala naung manghatindanghon haporseaon pahompunami si Botar on dijolo ni Tuhan. Di silas ni rohanami i, rodo hami Tulangmuna, pasahathon dengke sito-tio, asa sai tio ma parhorasan panggabean di hamu. Dengke simudur-udur, asa sai torop maribur ma hamu dipasu-pasu Tuhanta. Dengke saur, asa sai saur matua ma hita, jala horas-horas, dengke sahat, asa sahat ma na uli na denggan dipasu-pasuhon Tuhanta tu ho pahompunghu dohot tu hita saluhutna. Tung songon on pe dengke na hupasanat hami on, las ma roham pahompunghu manjalo. Botima.

6. Natoras Ni Na Malua

I ma tutu Tulang, Nantulang, sai dipasaut Tuhanta ma tangiang dohot pasu-pasumuna i Botima.

(Dungi, laos masisalaman ma. Molo adong dope uduran ni tulang lano pasahathon dengke sitio-tio/kado, langsung ma dipasahat, ndang pola be mandok hata, alai didok ma): Las ma roham pahompunghu manjalo dengke sitio-tio/ kado on. Sai Tuhan Debata ma na mandongani dohot na mamasu-masu hamu. Botima.

7. Parhata Ni Suhut

Di hamu Raja ni Hula hulanami dohot Raja na ginokhonl Di si las ni rohanami sadari on, naeng pasahatonnami ma nian na marniadopan ni sipanganon tu jolomuna. Mangarade ma hamu, asa ro hami pasahathon. Botima.

8. Parhata ni Hula hula

Na denggan angkup ni na uli Amangborul (Didompakhon tu sude uduran ni Hula hula dohot Raja na ginokhon, songon na patamahon, jala didokma): Rampak di son ma hita sude asa rampak manjalo hita na marniadopan ni sipanganon on na pinasahat ni Raja ni Parboruonta. On pe Amangboru, nunga rade hami. Tu jolo ni Amanta dohot Inanta on ma pasahat hamu. Botima.

9. Hata sidohonon tingki pasahat tudu tudu ni sipanganon.

Di hamu Amang, Inang, dohot di hamu sude horong ni Hula hulanami dohot Raja na hugokhon hami! Ro do hami tu jolomuna pasahathon na marniadopan ni sipanganon tu hamu. Tung songon on pe nuaeng na hupasahat hami on, las ma rohamuna manjalo Songon hata ni umpasa ni sijolo-jolo tubu ma dohonon:

Bagot na marhalto na tubu di robean.

Horas ma hamu na manjalo, sai lam tu tambana ma

di hami na mangalean.

Botima.

(Dung i laos masisalaman)

10. Parhata ni Hula hula

Di hita sude uduran ni Hula hula dohot Raja na ginokhon ni hasuhuton. Tung di jolonami pe nuaeng na marniadopan on, na rap manjalo ma hita disi. Botima.

(Sude natorop mangalusi): I ma tutu.

Di hamu Amangboru, ninna rohanami, ala hamu do na paradehon sipanganon, sian hamu ma na mambahen tangiang laho mangan Botima.

11. Parhata Ni Suhut

Na denggan angkup ni na uli Raja ni hula hulanami (Didompakhon tu dongan sabutuha na berpredikat Sintua) Bahen ma Hahang doli tangiangta laho mangan. (Sibahen tangiang mangan laos pasahathon hata ni sipanganon):

Sitik masihompa, golang pangarahutna.

Songon dia pe sipanganon na tupa, sai godang ma pinasuna.

Marjomuk ma hita.

(Huhut marsipanganon, diseati boru ni hasuhuton ma aliang- aliang, ate-ate dohot butuha raja laos dibagihon ma tu horong ni hula hula dohot natorop)

12. Parhata ni Hula hula

(Dung sae marsipanganon)

Di hamu Amangboru! Nunga diadophon hamu nangkin na marniadopan ni sipanganon on tu jolonami, na manungkun ma hami nuaeng tu hamu Amangboru, tarsongon dia ma parpeak ni on. Botima.

13. Parhata Ni Suhut

Gabe ma jala horas Rajanami. Taringot ni na marniadopan ni sipanganon na huadophon hami tu hamu Rajanami, songon na binotomuna, dison do dongan parhundulmuna, i ma Tulangnami, songoni nang angka Hula hulanami na asing dohot dongan sabutuha, boru/bere, dongan sahuta, dongan sahuria dohot pangula ni hurianami. Onpe Rajanami tuturi hamu ma hami. Botima Rajanami.

14. Parhata ni Hula hula

Na denggan angkup ni na uli Amangboru! Antong molo songoni do hape, hupasahat hami ma muse tu hamu, ai hamu do na umboto bidang ni alamanmuna, jadi hamu ma na mangatur songon adat hasomalan di hutanta on. Botima.

15. Parjambaran Juhut.

Parhata Ni Suhut

Na denggan angkup ni na uli Rajanami! Alai Rajanami, paima andorang so diseat raut, sai dengganan parjolo diseat hata. Jadi tarsongon on ma usulnami Rajanami. 

1. hasuhuton: ihur-ihur

2. hula hula tangkas: osang

3. tulang ni suhut: sian somba-somba

4. tulang rorobot (molo ro): sian somba-somba

5. boru ni hula hula: sambola parsanggulan siamun

6. boru/bere ni suhut : sambokla parsanggulan hambirang

7. dongan sabutuha : soit

8. dongan sahuta : soit

9. dongan /pangula ni hunia: soit

Beha paniroiomuna Rajanami? Molo une di rohani Raja i, asa borunami dohot paribannami ma na manghobasi di dapur. Annon dung sidung hita manghatai, di na laho marhehe na uli, disi ma dipasahat nasida tu angka hasahatanna Botima.

16. Parhata ni Hula hula

Na denggan angkup ni na uli Amangboru!

17. Parhata Ni Suhut

Mauliate malambok pusu ma hupasahat hami tu hamu Rajanam (Didompakhon tu boru): Di hamu borunami, dohot paribannami boan hamu ma tu dapur niadopan ni sipanganon on, asa hobasi hamu. Annon dung sae manghatai, pasahat hamu tu angka hasahatanna, paima so marhehe na uli. Botima.

18. Parhata ni Hula hula

Gabe ma jala horas Amangboru! Na manungkun ma hami nuaeng tu hamu Amangboru, tar songon dia ma lanjutan ni ulaonta. Ninna rohanami nian hamu ma na mangatur partording ni panghataionta Botima.

19. Parhata ni Suhut mangido tangiang, pasu-pasu sian Raja na Ginkokhon.

Gabe ma jala horas Raja ni Hula hulanami! Tong-tong dope mangido hami tu hamu Amanta Raja dohot tu hamu Inanta Soripada, Raja ni Dongan tubu, Raja ni Boru/Bere, Raja ni Dongan sahuta, dongan sahuria, tarlumobi di hamu Raja ni Hula hulanami asa lehon hamu hata poda, hata sipasingot, hata pasu-pasu, dohot hata sigabe gabe, suang songoni dohot hata tangiangsu anaknami si Botar on, anggiat asi rohani Tuhanta ditohaphon itu ibana.

Partording ni panghatajonta Rajanami, tar songon on ma nian: Parjolo ma sian dongan tubu, dungi diuduti boru/bere, dongan sahuta, dongan sahuria, pargomgom ma horong ni hula hula, dungi pe asa diampu hasuhuton, jala ditutup hula hula (pangula ni huria) ma marhite-hite ende dohot tangiang. Beha rohanta? (Loloan na marias ni roha mangalusi): Na denggan angkup ni na uli.

20. Hata tangiang/ sigabe gabe sian dongan sabutuha.

Parjolo ma hita mandok mauliate tu Tuhanta parasi roha i, na mangalehon hahipason di hita diparpunguan silas ni roha sadari on, boi anakta si Botar on manghatindanghon haporseaon di jolo ni Tuhanta na sinaksihon ni huria i. Sai dipargogoi ma ibana asa gabe sada sitindangi di harajaon ni Debata.

Di ho hasian, Botar, nunga manghatindanghon haposeaon ho nangkin di jolo ni Tuhan i, marhite-hite naposo-Na di bagas joro- Na i. On pe sidohononhu tu ho hasian, sai burju ma ho mangulahon hata ni Tuhanta i, sian nasa roham, sian nasa gogom, dohot sian nasa gok ni ngolum. Ringgas ma ho tu gareja, tarlumobi aktif di seksi pemuda manang naposo bulung ni huria i. Nunga gabe sada ruas ho di huria i. Songon hata ni Tuhanta di buku na badiai i: Sai jumolo ma lului hamu harajaon ni Debata dohot hatigoranna, dung i tambahononna do angka ondeng tu hamu. (Mat. 6. 33). Molo girgir ho manangi-nangi jala rajin mangulahon hata ni Tuhanta, porsea ma ho hasian, sai na lehonon ni Tuhanta do angka na sininta ni roham hombar tu lomo ni roha-Na. Antong sai Tuhan Debata ma na mamasu-masu dohot na mangaramoti ho hasian.

Suang songon i ma di hamu Hahang doli/ Anggi doli! Nang pe naung malua sian panghanghungion si Botar on, ndan na gabe lepas tangan manang lepas tanggung jawab hamu dipanogu- noguon tu si Botar on. Hot do hamu sorminan dohot na gabe sitiruon di ibana. Songon hata ni natua-tua ma dohonon:

Mangiamun pea majagar, mangambirang tu aek mardugu, der

Angka anak si oloi ajar, suruon mai tangkas marguru.

Botima.

21. Hata tangiang/ sigabe gabe sian Borul Bere.

Mauliate godang ma tapasanat tu Tuhanta parasi roha i, ai dilehon do hahipason dohot las ni roha di hita, bol pajumpang di bagasi Hula hulanami na marampang na marjual, sigomgom nasa pangisina on. Tarlumobi muse, marhite-hite asi dohot holong ni roha ni Tuhanta, nunga manghatindanghon haporseaon paramaannami si Botar dijolo ni Tuhanta nang dohot di jolon huria i. Sai tagogo ma martangiang, asa di parorot, diiring-iring dohot dipasu-pasu Tuhanta si Botar on, gabe sada sitindangid harajaon ni Tuhanta.

Di hamu Tulang na poso, na sogot nunga manghatindanghon haporseaon hamu di jolo ni Tuhanta Manghatindanghon haporseaon, dos do i na ni dokna, malua sian panghangkungion di hata Indonesia didok: lepas sidi. Malua sian panghangkungion, na marlapatan ma on, malua ma hamu sian tanggungan haporseaon ni orangtua. Jadi molo adong dosa na ni ulamuna tu Tuhan i, hamu nama mananggung i, ndang be natua-tua. Ala nii ma Tulang na poso, sai girgir ma hamu manangi-nangi, Jala ringgas mangulahon hata ni Tuhanta i. Sai sipangoloi ma hamu di angka poda ni natua-tua, tarlumobi di hata dohot kebenaran ni Tuhanta, asa boi hamu mangalo hisap-hisap ni daging, asa unang madabu tu angka narkoba na masa nuaeng on. Sai pangido ma pangurupion sian Tuhanta, asa Ibana na mampargogoi, na mangaramoti, na paturehon huhut na mamasu-masu diganup gulmit ni ngolum. Botima.

22. Hata tangiang/ sigabe gabe sian Dongan Sahuta.

Maullate ma tapasahattu Tuhanta, na mangalehon tingki na uli, na denggan on, boi hita marlas ni roha. Mauliate ma dohononnami tu hamu hasuhutonnami di siala gokhon dohot jou-joumuna, asa dohot hami mangadopi ulaon silas ni rohanta sadari on, i ma naung manghatindanghon haporseaon anakta si Botar di jolo ni Tuhanta marhite-hite naposo-Na di huria l. Las ma tutu rohanta, ai nunga hape mamasuhi matoras haporseaon ni ibana, jala gabe sada ruas ibana di huria i. Tamba ma muse sada nari sitindangi harajaon ni Tuhani sian jabu on. Alai nang pe songoni, tung mansai porlu dope panogu-noguon dohot poda silehonon ni natorasna, asa sai girgir ibana manangi-nangi, huhut mangulahon hata ni Tuhantai.

Di ho hasian, Botar! On ma sidohononnami tu ho. nunga di hatindanghon ho nangkin haposeаonmu di jolo ni Tuhanta, sada tanda ma i, na gabe sitindangi jala siihuthon Kristus ma ho tu joloan on. Marrupahon tugas na mulia do on, nang pe borat ulahononhon. Alai molo dilehon ho sian nasa roham, sian nasa ias ni ate-atem, dohot sian nasa gogom, sai na urupan ni Tuhanta i do ho hasian laho mangulahon i. Pangidoanami tu ho hasian, Botar, girgir ma ho di punguan na poso bulung ni punguan parsahutaonta di son. Gabe anak sitiruon, jala gabe anak sipartogi di na uli di na denggan di angka naposo bulung ni parsahutaonta. Sai Tuhanta ma na mangalehon bisuk dohot gogo nang dohot pasu-pasu-Na tu ho hasian. Botima

23. Hata tangiang/sigabe gabe sian Dongan Sahuria.

Parjolo ma hita mandok mauliate tu Tuhanta parasi roha na sumurungi ai asi dohot holong ni roha-Na do asa saut manghatindanghon haporseaon, manang malua sian panghanghungion (Lepas Sidi) si Botar on di bagas joro ni Tuhanta i na sogot. Hita pe dohot do marlas ni roha, ai sipartohap jala gabe sitindangi ma si Botar on di harajaon ni Tuhan Debata. Sai asi ma rohani Tuhanta, sal di bahen ma ibana gabe siihuthon Kristus na manongtong, jala sitindangi di harajaon ni Tuhan i. Di ho hasian, Botar! Sidohononnami tu ho hasian sian hurianta. nunga dihatindanghon ho nangkin haposeаonmu di jolo ni Tuhanta, di huri-Na i, sai didongani jala di pargogoi ma ho, gabe sada sitindangi na hot jala sipararat harajaon ni Tuhanta. Pangidoannami tu ho hasian, pintor aktif ma ho di naposo bulung ni hurianta, jala anggota sitiruon, jala siihuton ni donganmu naposo ma ho hasian di na denggan, dohot di na uli. Sai Tuhanta ma na mangalehon bisuk dohot gogo nang dohot pasu-pasu di ho, asa boi ho gabe partohap dohot sipararat harajaon ni Tuhanta i. Botima.

24. Parhata Ni Suhut

Di hamu sude uduran ni Hula hulanami! Nunga be marliat-liat dongan sabutuhanami, boru/berenami, dongan sahutanami, dohoi dongan sahurianami pasahathon hata sigabe gabe dohot hata pasu-pasu tu hami, tarlumobi tu anakhonnami si Botar on. On pe Thulehon hami ma tingki tu hamu, asa lehon hamu hata sigabe gabe dohot hata pasu-pasu nang dohot hata tangiang tu anaknami si Botar on. Hamu ma Rajanami na masiaturan. Botima.

25. Parhata Ni Hula hula mangatur partording na pasahat hata pasu-pasu.

Di hita Hula hula ni Parboruontal Ise ma parjolo sian hita mandok hata. Molo une di rohamuna, parjolo ma nian sian hami hula hula tangkas dohot udurannami pasahathon hata sigabe gabe dohoi hata pasu-pasu tu Raja ni Parboruonta, tarlumobi tu pahompunta si Botar on. Dung i pe annon asa diuduti Haha ni parhundulnami, ma Tulang ni hasuhuton dohot uduranna. Beha rohanta? (Uduran ni hula hula mangalusi): Na denggan angkup ni na uli.

26. Hata tangiang/sigabe gabe/pasu pasu sian Ompung Bao /Tulang /hula-hula.

Di hamu Amang Hela, dohot ho Boru hasian, nang dohot di pahompunami si Botar, suang songon i di hamu sude Raja naginokhon! Parjolo ma hita mandok mauliate tu Tuhanta parasi roha i, ai ala asi ni roha-Na do na mambahen saut pahompunami si Botar on mangha-tindanghon haporseaon di jolo ni Tuhanta, dohot di jolo ni huria i, gabe marlas ni roha hita. On pe di las ni rohantaro do hami laho pasahathon ulos holong tu pahompunami si Botar on. Tung songon on pe nuaeng ulos holong na hupasahat hami on, las ma roha ni pahompunami manjalo. Unang bereng hamu sian argana manang sian ulina, ala dalan patuduhon holongnami ma on, marhite-hite tangiang asa sa di ulosi, diramoti huhut ditogu-togu Tuhanta ibana songon sada sitindangi di harajaon ni Tuhanta.

Di ho pahompu hasian. (Diuloshon ma ulos holong i tu si Botar, jala didok ma hatana): Sai martinangi ma Tuhanta Debata, sai diulosi, ditogu-togu, diramoti, dohot dipasu pasu jala digomgom Tuhanta ma ho tu joloan ni ari on. Sai gogo ma martangiang, asa bana na mangalehon bisuk dohot tiur ni pingkiran nang dohot togu ni haporseaon laho mangalo angka pangunjunan na masa nuaeng on.

Di hamu pe Amang Hela dohot di Borunami! Molo manghatindanghon haporseaon, dos do i dohot na malua sian panghanghungion. Unang sala hita di astuan ni pandohan: malua sian panghanghungion, ndang marlapatan lepas tangan orang tua dipanogu-noguon dohot di parngoluon siganup ari tu anakhonna. Memang, molo mardosa si Botar on tu Tuhanta, manang na olo mangulahon na so nihalomohon ni rohani Tuhanta, ibana ma tutu manjalo upa ni dosana i, ndang be natua-tuana. Ala ni i ma di hamu Helanami dohot Borunami, asa tong-tong ma poda-podai jala tangianghon hamu ibana tu Tuhantai, asa lam togu haporseaonna, asa gabe anak sitiruon dohot anak sipasangap natua-tua, lumobi sipasangap Tuhanta. Botima.

(Molo adong do haha anggi ni Ompung Bao, manang Paranakonna na naeng pasahat ulos holong, laos udur ma manguloshon ulos holong i. Ndang pola be mandok hata sigabe gabe, holan didok ma): Las ma roham pahompungku, sai Tuhan Debata ma na manggomgom ho Botima.

27. Hata tangiang/ sigabe gabe sian Boru.

Tapuji tapasangap ma Tuhanta na mangalehon hahipason dohot las ni roha di parpunnguanta sadari on. Marlas ni roha hita, ala asi dohot holong ni roha-Na, saut manghatindanghon haporseaon anakta si Botar on di jolo ni Tuhanta dohot di jolo ni huria i. Di silas ni rohanta i, di son huboan hami do ulos holong (kado) sipasahatonnami tu anakta si Botar on.

Tung songon dia pe nuaeng ulos holong (kado) on, las ma roha ni anakniba si Botar on manjalosa. Unang bereng Anaha argana, manang ulina, alai na patuduhon holong dohot las ni rohanami do di ho di na manghatindanghon haporseaon ho nangkin di bagay joro ni Tuhanta (Laos di uloshon ma ulos holongi) dilehon me kado i tu si Botar, jala didok ma hatana): Las ma roha mamangke ulos/kado on, jala sai Tuhanta ma na manggomgom ho.

Di ho Anaha Botar! Nangkin nunga manghatindanghon haporseaon ho di jolo ni huria ni Tuhanta, na marlapatan do ingkon burju ma ho mamparsiajari dohot mangaradoti hata ni Tuhantai, asa unang ho tarjerumus tu angka pangalaho ni naposo na so marhaporseaon, alai patudu ma ho gabe sira dohot sondang na sian Tuhantai. Sai Tuhanta ma na manglehon gogo doho bisuk, nang dohot torang ni pingkiran di ho, asa gabe anak sitiruan ho ditonga-tonga ni huria ni Tuhanta, nang dohot di tonga-tongani masyarakat. Botima.

(Molo adong uduran ni boru ni hula hula na naeng mangalehon ulos holong manang kado, langsung ma di pasahat, jala ndang pola be mandok hata sigabe gabe, cukup ma didok):

Las ma roham manjalo on, sai Tuhanta ma na mamasu-masu ho Botima.

28. Hata tangiang/ sigabe gabel pasu-pasu sian Tulang

Parjolo ma hita mandok mauliate tu Tuhanta, ai marhite asi dohon holong ni roha-Na, boi hita marpungu di bagasan hahipason dohoi las ni roha, ala nunga saut pahompunami si Botar on manghatindanghon haporseaon di jolo ni Tuhanta dohot di joloni huria i. Di silas ni rohantaro do hami Tulangmuna labo pasahathon ulos holong tu pahompunami si Botar on. Molo tung songon on pe ulos na hupasahat hami on, unang ma bereng hamu sian argana manang sian ulina, alai bereng hamu ma sian holongnami tu pahompunami si Botar on. Dalannami martangiang do on, asa Tuhanta ma na mangulosi huhut na manggomgom daging dohot tondina. (Diuloshon ma ulos holongi tu badan nisi Botar, jala didok ma hatana muse): Sai Tuhanta ma na mangulosi dohot na manggomgom ho pahompungku hasian.

Di pahompungku, si Botar! Nangkin nunga manghatindanghon haporseaon ho dijolo ni Tuhanta nang dohot di jolo ni huria i. Na marlapatan do i, gabe sada sitindangi huhut sipararat harajaon ni Tuhanta ma ho. Asa boi gabe sada silindangi di harajaon ni Tuhan, ingkon girgir ma ho manangi-nangi dohot mangaradoti hata ni Tuhanta. Ringgas ma ho manjaha buku na badia i, ringgas tu gareja, jala anggota na aktif di naposo bulung. Pelajaranmu di Sikola pe, unang hatinggalan. Poda ni Raja Salomo. Biar mida Jahowa do mula ni parbinotoan. Sai Tuhanta ma na mangiring- iring dohot na manogu-nogu ho, asa boi ho gabe sitindangi ni Kristus. Songon hata ni natua-tua ma dohonon:

Habang ambaroba, songgop tu tonga onan,

Unang ho hona narkoba, ali do mula ni hamagoan.

Baris-baris ni gaja, di rura pangaloan,

Biar mida Jahowa do mula ni parbinotoan.

Botima.

(Molo adong uduran ni tulang na naeng mangalehon ulos holong manang kado, langsung ma dipasahat, jala ndang pola be marhata sigabe gabe, alai didok ma): Las ma roham manjalo ulos holong/ kado on, sai Tuhanta ma na mangaramoti ho. Botima.

29. Parhata Ni Suhut

Di hamu sude uduran ni Hula hulanamil Paima so huampu hami hata sigabe gabe dohot hata pasu-pasu na pinasahatmuna tu hami, lehon hamu ma jolo tingki di hami laho pasahathon sipalas roha dohot pasituak na tonggi tu hamu sude uduran ni Hula hulanami. Botima.

30. Parhata ni Hula hula

Na denggan angkup ni na uli Amangborul Nunga rade hami, pasahat hamu ma.

31. Hata sidohonon ni Boru/Hela tingki pasahat pasituak na tonggi.

(Borhat ma Ama ni Botar dohot Inantai, pasahathon sipalas roha tu Hula hula tangkas dohot tulang, huhut pasahat pasituak na tonggi tu sude uduran ni Hula hula.)

Di hamu Raja ni Hula hulanami! Tung so sadia pe na hupasahat hami on, las ma rohamuna manjalo. Gogo hamu Rajanam martangiang tu Tuhanta, asa lam ditambai di hami pansarian pansamotan, asa adong bahenonnami laho pasikolahon pahompumuna on, jala asa umbalga muse lehononnami tu hamu.

Botima.

(Laos di jalanghon ma tu Amanta/Inanta i sipalas roha, huhut di pasahat nasida ma pasituak na tonggi tu sude uduran ni hula hula)

32. Hata pangampuon sian Natoras ni na Malua.

Mauliate godang ma tapasahat tu Tuhanta, ala dilehon do tingki na denggan on, boi hita pajumpang di bagasan hahipason dohot as ni roha. Jala mandok mauliate do hami tu hamu Amanta Raja dohot inanta Soripada di haradeon ni rohamuna, marneang n langka hamuro mangadopi ulaon silas ni roha, i ma na manghatidanghon haporseaon, manang maluasian panghanghungion, (di hata Indonesia didok. lepas sidi) di bagas joro ni Tuhanta na sogot anaknami si Botar on. Molo tung humurang pe panjalonami di hamu Rajanami, marpanganju ma hamu di hami.

Jala mauliate ma hupasahat hami tu hamu sude uduran ni Hula hulanami, na pasahathon dengke sitio-tio, dengke simudur-udur, dengke saur, dengke sahat, nang dohot ulos holong, suang songon i dohot hata sigabe gabe dohot hata pasu-pasu, na pinasahatmuna tu hami, tarlumobi tu anaknami si Botar on. Sai manjangkon ma badan dohot tondi ni si Botar on dipasu-pasu Tuhantai. Uli basamuna i Rajanami, ndang tarbalos hami i, sai sian Tuhanta ma jalo hamu balosna marlipat ganda. Asi ma roha ni Tuhanta, sai dilehon ma di hamu hahipason dohot ganjang ni umur, asa adong hamu laho mamoda-modai hami ianakhonmuna. 

Ndang lupa hami mandok mauliate tu hamu dongan sabutuhanami, boru dohot berenami, dongan sahutanami, dongan sahurianami. Ndang na saut ulaon las ni rohanta on, ianggo so ala ni pangurupiomuna. Angka sibahenon dohot gogomuna, na pinasahatmuna tu hami, tariumobi poda, sipasingot, tangiang, dohot pasu-pasu tu anaknami si Botar on, sai asi ma roha ni Tuhanta, dipasaut ma hata na uli hata na denggan na pinasahatmuna i tu hami, nang tu anaknami si Botar on Uli basamuna i Amang Raja, dohot hamu Inang Soripada, ndang tarbalos hami i, sai sian Tuhanta ma jalo hamu balosna marlompit ganda.. Martinangi ma Tuhanta, sai dilehon ma hahipason dohot ganjang ni umur di hamu. Botima.

33. Hata Pangampuon sian na Malua.

Mauliate ma di Tuhanta. Jala mauliate godang ma hupasahat tu hamu Tulang/ Nantulang na mangalehon dengke upa-upa dohot ulos holong nang dohot angka kado. Sude hata pasu-pasu, hata sigabe gabe nang hata poda na pinasahatmuna tu ahu, sai dijangkon badan dohot tondingku ma i bahenon ni Tuhanta. Unang lupa hamu mamboan ahu di tangiangmuna, asa anggiat gabe anak na hasea ahu, di jolomuna nang dohot di jolo ni Tuhanta. Botima.

34. Parhata Ni Suhut

Nunga be huampu hami hata sigabe gabe dohot hata pasu-pasu na pinasahatmuna tu hami Rajanami. On pe asa tung singkop sude ulaonta on, ninna rohanami, hamu pangula ni hurial Hula hulanami ma mambahen tangiang panutup. Botima.

35. Parhata ni Hula hula

Na denggan angkup ni nauli Amangborul (Didompakhon tu sahalak dongan tubu ni hula hula na berpredikat Sintua, didok ma hatana): Dahahang Sintua Pa Jonas ma manutup ulaonta, marhite- hite ende, jala ditutup dohot tangiang. Botima.

(Dung sidung martangiang, marhehe na ulima, jala masisalaman. Laos ditingki i ma dipasahat jambar juhut naung dibungkusi hian tu angka na patut manjalo.).