Tardidi (Baptis)

1. Pangaradeon. 

Dung singkop haroro ni sude raja na digokhon dohot na dijou digorahon paidua ni suhut ma asa masuk nasida tu jabu jala hundul di inganan nanung pinarade ni hasuhuton, ala naeng mulai ma acara

2. Paidua ni Suhut

Di hamu Amanta Raja dohot Inanta Soripada na hugokhon hami Raja ni boru/ bere, Raja ni dongan sahuta, Raja ni dongan tubu tarlumobi ma di hamu Raja ni hula hulanami, ala nunga dapot be tingkina, naeng mulaanta ma ulaonta, masuk ma hita tu jabu Rajanami. Botima

(Dung masuk sude angka raja na ginokhon, paidua ni suhut mangatur parhundul nasida Hasuhuton hundul di jabu bona, hana-anggi dohot dongan sahuta di siamun, boru/ bere di siambirang, jonok tu pintu. Hula hula hundul di uluan ni jabu, masidompahan dohot hasuhuton. Tulang ni hasuhuton, di siamun ni hula hula, pariban di siambirang ni hula hula).

3. Hata huhuasi sian Parhata Ni Suhut

Di hamu Amanta Raja dohot Inanta Soripada, Raja ni Boru/ Bere, Raja ni Dongan tubu, Raja ni Dongan sahuta, tarlumobi di hamu Raja ni Hula hulanami! Hombar tu gokhon dohot jou-jounami, mauliate godang ma hupasahat hami tu hamu diharadeon ni rohamu Amang Raja, marnatampak dohot Inanta Soripada marneang ni langka hamu ro mangadopi ulaonta sadari on. Tangkas ma paboaonnnami tutu, haroan marharoanan, sintuhu ni las ni rohanta di ari na uli di ari na denggan on. Na sogot nunga manjalo pandidion na badia anaknami si Kevin on sian Tuhanta di bagas joro, di gereja ni Tuhanta. (Adong deba mandok, pasurathon goar ni si Kevin on di buku pustaha na badia i, asa tarsurat sogot goamna di surgo hasonangan i. Adong mandok, mangalap goar tu gareja, na marastuan, mulai sadari on goaron ma si Kevin on sada halak Kristen, si ihuthon Kristus). Di silas ni rohanta i Amang Raja, dohot Inang Soripada, asa lehon hamu angka pasu-pasu nang angka tangiang tu anaknami si Kevin on, anggiat nian simbur magodang, pengpeng saur matua jala sehat sehat ibana tu joloan on. Gabe anak na pistar, anak na malo, anak na bisuk, anak na uli basa, anak sioloi huhut sipasangap orangtua, tarlumobi sioloi jala sipasangap Tuhanta muse si Kevin on, Songon i ma hata huhuasi, manang hata patujolonami. Na mangido, mangelek ma hami Amang Raja dohot hamu Inang Soripada, tarlumobi di hamu Raja ni Hula hulanami, asa jolo marsipanganon ma hita, ipe asa lehon hamu angka hata sigabe gabe, hata pasu-pasu. Alai nang hudok hami songon i, tuturi hamu hami Rajanami. Botima.

4. Parhata ni Hula hula

(Parjolo masipatamaan hata hula hula dohot dongan parhundu dongan tubu ni hasuhuton, dongan sahuta ni hasuhuton, boru bere ni hasuhuton. Somalna pintor hula hula tangkas do na mambahen inisiatif.)

Horas jala gabe ma Amangboru ! Parjolo ma hami mandok mauliate tu hamu Amangborunami, disiala gokhon dohot jou. joumuna di na mangharoani pahompunta si Kevin on hita, ala naung manjalo pandidion na badia ibana di bagas joro ni Tuhantai na sogot (Didompakhon tu dongan parhundul ni hula hula, ima tulang ni hasuhuton): On pe di hita hula hula ni hasuhuton, ninna rohanaminian, parjolo ma Hula hula tangkas pasahathon sipasahatonna tu hasuhuton, baru pe di uduti tulang ni hasuhuton dohot angka hula hula na asing. Beha rohanta? (Dialusi hula hula na asing): Na denggan angkup ni nauli.

5. Hata ni Hula hula tangkas (Ompung Bao/Tulang ni na Tardidi) tingki pasahat upa-upa ni na Tardidi.

Di hamu Amang Hela, dohot ho Boru hasian, lumobi di ho pahompungku, si Kevin na manjalo Sakramen Pandidion sadan on. Mauliate ma tadok tu Amanta Debata Parasi Roha mangalehon ari na uli ari nadenggan on di hita. Nunga be saut tardidi pahompungku si Kevin on tu bagasan goar ni Tuhanta Sai saut ma ibana gabe sipangihut jala sipararat hata ni Tuhanta tu joloan ni ari on.

Di son huboan hami do songon upa-upam, dengke sitio-tio, asa sai tio ma antong panggabean, parhorasan di hamu tu joloan on Dengke simudur-udur do on, asa sai huhut denggan hamu marudur-udur, masipaolo-oloan hamu laho mangalului jampalan na lomak asa adong bahenonmuna laho marmudu-mudu dohol mandidik pahompunami si Kevin on.

Dengke saur do on, huhut jala dengke sahat, asa sai saur ma antong ibana manjujung goarna i, sahat simbur magodang jala saur matua mauli bulung pasu-pasuon ni Tuhanta Pardenggan basa i. Songon i ma jolo sahat ni hata sian hami. Botima.

6. Natoras Na Tardidi

I ma tutu Amang, Inang, sai sahat ma na uli na denggan songon na ni dokmuna i. Botima.

(Dung i masijalangan)

7. Hata ni Tulang ni Suhut di tingki pasahat dengke upa-upa tu na Tardidi.

Di hamu Bere, dohot di hamu Boru hasian, nang dohot di pahompunami on mandok mauliate ma hita tu Tuhanta, ala nunga saut manjalo pandidion na badia na sogot si Kevin on. Di las ni rohantai, rodo hami Tulangmuna pasahathon upa-upa ni pahompunami si Kevin on, i ma marhite dengke sitio-tio, asa tio. ma parsaulian, tio ma parhorasan di hamu suang songon i di pahompunami on. Dengke simudur-udur, asa sai marudur-udur ma hamu tu dolok tu toruan mangalului pansarian pansamotan na lumomak, asa adong bahenonmuna laho marmudu-mudu dohot mandidik pahompunami on. Dengke sahat, dengke saur, asa sai sahat ma ibana simbur magodang, pengpeng saurmatua ditumpak asi dohot holong ni roha ni Tuhanta. Songon i ma jolo hata sian hami. Botima.

8. Natoras Na Tardidi

I ma tutu Tulang, Nantulang, sai di pasaut Tuhanta ma tangiang dohot pasu-pasumuna i. Botima. (Laos masijalangan)

9. Parhata Ni Suhut

Di hamu Raja ni Hula hulanami. Nunga dipasahat hamu nangkin upa-upa ni pahompumuna, mandok mauliate godang ma hami tu hamu. Di las ni rohanta sadari on, asa naeng pasahatonnami ma nian na marniadopan ni sipanganon tu hamu Hula hulanami. Mangarade ma hamu. Tu jolo ni ise ma hupasahat hami. Botima.

10. Parhata ni Hula hula

Na denggan angkup ni na uli Amangboru. (Didompakhon tu uduran Ini tulang dohot angka hula hula na asing songon na patamahon) Rampak di son ma hita Hana ni parhundulnami laho manjalo sipanganon na marniadopan na pinasahat ni Parboruonta.

On pe Amangboru, nunga rade hami. Tu jolo ni Amanta dohot Inanta on ma pasahat hamu. Botima.

11. Hata sidohonon ni Natoras ni na tardidi tingki pasahat tudu-tudu ni sipanganon.

Di hamu Amang, Inang, dohot di sude hamu Hula hulanami, suang songon i Raja ni Dongan tubu, Raja ni Boru/Bere, Raja ni Dongan sahuta, pariban dohot ale-ale. Nangkin nunga hujalo hami upa-upa ni pahompumuna siala na tardidi ibana, saonari huadophon hami ma tu hamu tudu tudu ni sipanganon na marniadopan, laho pasangaphon hamu Raja na huontang hami. Tung songon on pe nuaeng tudu tudu ni sianganon na hupasahat hami on tu hamu, las ma rohamuna manjalo. Songon hata ni sijolo-jolo tubu ma dohonon:

Bagot na marhalto na tubu di robean,

Horas ma hamu na manjalo, sai lam martamba ma di hami na mangalean.

Botima.

(Dung i laos masijalangan)

12. Parhata ni Hula hula

Di hita horong ni Hula hula ni Parboruonta, suang songon i donat angka Raja na niontang ni hasuhuton, tung di jolonami pe nuaeng na marniadopan on, na rap manjalo ma hita disi. Botima. 

Di hamu Amangboru, ninna rohanami, sian hamu ma na mambahen tangiang laho mangan. Botima.

13. Parhata Ni Suhut

Na denggan angkup ni na uli Rajani Hula hulanami (Didompakhon tu dongan sabutuha na berpredikat Sintua) Bahen ma Hahang doli tangiang laho mangan. Botima.

(Sibahen tangiang mangan, laos pasahathon hata ni sipanganon):

Sititik marsigompa, golang pangarahutna,

Songon dia pe sipanganon na tupa, sai godang ma pinasuna.

Marjomuk ma hita.

(Huhut marsipanganon diseati boru ni suhut ma aliang-aliang, ate- ate dohot butuha raja laos dibagihon tu Hula hula dohot situan natorop)

14. Parhata ni Hula hula

(Dung sae marsipanganon).

Di hamu Raja ni Parboruonnami. Nunga dipasahat hamu nangkin na marniadopan ni sipanganon on tu jolonami, na manungkun ma hami tu hamu Amangboru, tarsongon dia ma parpeak ni on. Botima.

15. Parhata Ni Suhut

Gabe ma jala horas Rajanami. Taringot ni na marniadopan ni sipanganon na huadophon hami tu hamu Rajanami, songon na tangkas binotomuna, dison do dongan parhundulmuna, i ma Tulangnami, songon i nang angka Hula hula na asing dohot dongan sabutuha nang dongan sahuta dohot boru/ berenami. On pe tuturi hamu ma hami, Rajanami. Botima.

16. Parhata ni Hula hula

Na denggan ma angkup ni na uli Amangboru! Antong molo songon i do hape, hupasahat hami ma tu hamu, ai hamu do umboto bidang ni na ginokhonmuna. Hamu ma na marbagi songon adat hasomalan di hutanta on. Botima.

17. Parhata Ni Suhut

Na denggan angkup ni na uli Rajanami! (Dibagi boru ni hasuhuton ma na margoar ni sipanganon i tu amgka na patut manjalo.)

18. Mangido hata tangiang, sigabe gabe sian Raja na Ginokhon

Parhata Ni Suhut

(Dung sae marbagi jambar)

Gabe ma jala horas Raja ni Hula hulanami! Tongtong dopa mangido hami tu hamu Amanta Raja dohot hamu Inanta Soripada, Raja ni dongan tubu, Raja ni boru dohot Raja ni dongan sahuta, tarlumobi Raja ni Hula hulanami, asa lehon hamu hata tangiang, hata pasu pasu dohot hata sigabe gabe tu hami lumobi tu anaknami si Kevin on. Molo dos rohanta, tarsongon on ma partording ni na pasahathon hata tangiang, hata pasu-pasu dohot hata sigabe gabe. Parjolo ma sian dongan tubu, dung diuduti boru/bere dohot dongan sahuta, dongan sahuria dohot ale. ale, pargomgom ma hula hula, dung i pe asa diampu hasuhutor jala ditutup hula hula i ma marhite-hite ende dohot tangiang. Beha rohanta? (Loloan mangalusi): Na denggan angkup ni na uli.

19. Hata tangiang dohot sigabe gabe sian Dongan Sabutuha.

Parjolo ma hita mandok mauliate tu Tuhanta Parasi roha i, na mangalehon hahipason di anakta si Kevin, boi ibana sadar on manjalo goarna marhite pandidion na badia sian Tuhanta di bagas joro na badia i. Sai asi ma antong rohani Tuhanta, songon naung jinangkon ni Tuhanta ibana mulai sadari on, gabe masuk tu huria. Na jala partohap ma ibana di harajaon ni Tuhanta. Tuhanta ma na mangiring-iring, manogu-nogu ibana, asa simbur magodang pengpeng saur matua, jala asa tongtong ibana siihuthon Tuhantal Songon hata ni umpasa ma dohononhu :

Rutruton golang-golang, ulluson pura-pura, bo

Simbur ma ibana magodang, pengpeng saurmatua

Dangka ni hariara ma tongka pinangait-aithon,

Simbur ma ibana magodang, tongka panahit-nahiton

Nunga tarsurat goar ni si Kevin on di buku hangoluan i. Horas ma ibana manjungjung goarna i. Goar donganna gabe, donganna mamora, goar donganna saur matua ma antong goarna i dipasu pasu Tuhanta. Songon hata ni umpasa ma dohononhu :

Dolok ni Janjimaul hatubuan ni simarhora-hora,

Goar na uli ma goarna i donganna gabe jala mamora.

Huujungi ma hatanghon dohot umpasa:

Sahat-sahat ni solu ma sahat tu bontean,

Sahat ma hita leleng mangolu, sahat tu parhorasan panggabean

Botima, Hatangki hata tambaan.

20. Hata tangiang sian Borul Bere.

Mauliate ma tapasahat tu Tuhanta Parasi roha i, ai dilehon do hahipason dohot las ni roha di hita, boi pajumpang di bagas ni Hula hulanami na marampang na marjual on sigomgom nasa pangisina. Tariumobi muse, marlas ni roha hita marhite asi dohot holong ni roha ni Tuhanta i, nunga manjalo pandidion na badia paramaannami si Kevin sian naposo ni Tuhanta di gareja na sogot. Martangiang ma hita, asa Tuhanta na marorot dohot na manogu-nogu ibana, asa simbur magodang, gabe anak na uli basa, anak sipasangap natua tuana, tarlumobi sipasangap Tuhanta Debata.

Di hamu Tunggane, Ama ni si Kevin dohot Inang Baonami! Sai martangiang do hami tu Tuhanta Parasi roha i, asa dilehon di hamu gogo dohot bisuk laho marmudu-mudu dohot mandidik paramaannami on. Jala mangido do hami tu Tuhanta, asa diusehon tu hamu pasu-pasu-Na di pansarian, pansamotan, asa adong bahenonmuna laho marmudu-mudu dohot pasikolahon paramaanami on sahat tu singkola na timbo. Unang lupa hamu Tunggane, Inang Bao mamboan paramaanami on tu gareja tiap minggu. Jala dung marumur ibana 3 manang 4 taon, asa pintor pamasuk hamu ma ibana tu sikola minggu sahat tu na menjelang remaja. Dung i masuk ma ibana muse tu kelompok remaja ni huria l,dohot satorusna. Marhite i ma dalanta manogu-nogu ibana, asa tongtong siihuthon Kristus ibana. Songon hata ni umpasa na mandok:

Habang amabaroba di atas ni Sibuntuon,

Sai anak na burju ma ibana marroha, jala jolma sitiruon.

Songon i ma hatanami. Hatanami i hata tambaan. Botima.

21. Hata tangiang / hata gabe gabe sian Dongan Sahuta.

Mauliate ma tapasahattu Tuhanta, na mangalehon tingki na uli, na dennggan on, boi hita marlas ni roha, Mauliate ma dohononnami tu hamu hasuhutonnami di siala gokhon dohot jou-joumuna, asa dohot hami marlas ni roha ala naung manjalo pandidion na badia anakta si Kevin on sian bagas joro ni Tuhanta. Songon hata nisijolo-jolotubu :

Poltak bulan tula sirajamanggule

Molo marharoan hasuhuton dohot dongan sahuta mahulae.

Sai asi ma roha ni Tuhanta, simbur magodang jala pengpeng sau matua ma ibana. Gabe anak na bisuk, anak na uli basa, anak sioloi ajar jala sipasangap natua-tua, tarlumobi siolol jala sipasangap Tuhanta Debata. Di hamu pe amang Pa' Kevin dohot Inang, sai dilehon Tuhanta ma di hamu bisuk dohot gogo songon i nang pansarian pansamotan, asa boi hamu marmudu mudu dohot mandidik si Kevin on tu joloan on. Songon hata ni natua-tua ma dohonon:

ljuk ma tarup ni sopo godang, Basbason tarup ni sopo balian,

Simbur ma ibana laho magodang,

Pengeng laho matua, dao ma parsahiton.

Botima.

22. Hata tangiang dohot hata sigabe gabe sian Dongan Sahuria.

Parjolo ma hita mandok mauliate tu Tuhanta parasi rohana sumurung i, ai ala asi dohot holong ni roha-Na do asa saut manjalo pandidion na badia si Kevin on di bagas joro ni Tuhanta na sogot. Hita pe marlas ni roha, al goaron ma si Kevin on, halak Kristen, sipartohap di harajaon ni Tuhanta i. Asi ma rohan Tuhanta, dibahen ma ibana siihuthon Kristus na manongtong, jale sipararat harajaon ni Tuhanta.

Sai dipasu-pasu Tuhanta ma ibana gabe anak na bisuk jala na u basa. Di hamuna pe antong sai dilehon Tuhanta ma pansarian pansamotan, asa boi hamu marmudu-mudu dohot mandidik dakdanak itu joloan ni ari on. Unang lupa hamu mamboan ibara tu gareja ganup minggu, jala molo dung marumur ibana 3 manang 4 taon pintor daftarhon hamu ma si Kevin on tu sikola minggu Botima.

23. Parhata Ni Suhut

Di hamu sude uduran ni Hula hulanami. Hupasahat hami ma tingki tu hamu, asa pasahat hamu hata sigabe gabe tu anaknami dohot natorasna. Hamu ma Rajanami na masiaturan. Botima.

24. Parhata ni hula hula pasahat Hata sigabe gabe dohot hata pasu-pasu.

Di hita Hula hula ni Parboruonta! Ise ma parjolo mandok hata sian hita. Molo usulnami nian, parjolo ma hami Hula hula tangkas dohot Borunami, dung i diuduti Tulang ni hasuhuton manang Haha ni parhundulnami. Beha rohanta? (Horong hula hula mangalusi): Na denggan angkup ni na uli!

25. Hata tangiang/ sigabe gabe/pasu pasu sian Ompung Bao (Hula hula).

Di hamu Amang Hela, dohot ho Boru hasian! Parjolo ma hita mandok mauliate tu Tuhanta Parasi roha i, ai ala asi ni roha-Na do na mambahen saut manjalo padidion na badia pahompunami si Kevin on, gabe marlas ni roha hita. On pe di las ni rohanta i, naeng pasahatonnami ma ulos parompa ni pahompunami si Kevin on. Tung songon on pe ulos parompa na hupasahat hami on, las ma rohamuna manjalo. Unang bereng hamu argana manang ulina, alai bereng hamu ma songon sada tanda manang simbol do on, patuduhon holong ni rohanami tu hamu, tarlumobi tu pahompunami si Kevin on.

Jala sada dalan parhitean do on, mangido tu Tuhanta, anggiat ma las dagingna, las nang tondina mamangke ulos parompa on. Martinangi ma Tuhanta Parasi roha i, dilehon bisuk dohot gogo di hamu laho marmudu-mudu, manogu-nogu dohot mandidik pahompunami on, asa gabe halak Kristen situtu ibana tu joloan ni ari on. Sal di bagasan tangiang ma hamu pature-ture pahompu on, anggiat gabe anak sipajoloon ibana, jala siboan las ni roha di hita, tarlumobi di Tuhantal. Songon hata ni umpasa :

Tubu ma tambinsu di dolok ni Sipoholon,

Sai gabe anak na bisuk ma ibana, anak sipatujoloon.

Naung sampulu sada jumadi sampulu dua,

Sai siboan sangap ma bana, jala siboan tua.

(Laos diuloshon ma tu pahompuna ulos parompa i sian jolo di abingan ni natorasna boru)

Unang lupa hamu di hata "balita," lapatanna bayi lima taon. Di tingki umur sisongon on do porlu lehonon perhatian na botul-botul tu bayi, lumobi mai taringot ni sipanganonna, ingkon angka na margizi ma.

Ai di masa-masa umur lima taon on do terbentuk IQ ni dakdanak Molo ni lehon do roha na botul-botul mangurus dakdanak on, boi ma hita manghirim, dung magodang ibana gabe anak na pistar, anak na malo, anak na bisuk, anak sipatujoloon. Songon na ni dok nuaeng on, sumber daya manusia, i ma jolma na berkwalitas di ngoluna. 

Antong asi ma rohani Tuhanta, sai dilehon ma angka na tahirimi di ngolunta, hombar tu lomo ni roha ni Tuhanta. 

Suang songoni ma di hamu Amangboru dohot Namborunami Bere dohot Ibeberenami apala saluhut hamuna na hupandohi hami, mandok mauliate godang do hami tu hamu di siala renta ni rohamuna mangadopi ulaon on. Songon hata ni umpasa ma dohonon:

Binaga ni Sihombing, binongkak ni Tarabunga,

Tu sanggar ma amporik, tu lubang ma satua,

Sinur ma na pinahan, gabe ma na niula,

Horas ma hamu pardalan-dalan, mangomo ma partiga-tiga.

Sahat-sahat ni solu, sal sahal ma tu bontean,

Sai leleng ma hita mangolu, sahat tu parhorasan panggabean.

Botima.

(Molo adong do haha anggi ni Ompung Bao, manang Paranakonna na naeng mangalehon ulos parompa tu dakdanaki, laos udur ma manguloshon ulos parompa/ kado i tu anak na tarda i. Ndang pola be mandok hata sigabe gabe, cukup ma didok): Las ma roham manjalo ulos parompa/ kado on. Sai Tuhanta ma na mangaramoti ho. Botima.

26. Hata tangiang/gabe gabe sian Boru.

Tapuji tapasangap ma Tuhanta na mangalehon hahipason dohot las ni roha di parpunguanta sadari on. Marlas ni roha hita, al nunga saut manjalo pandidion na badia si Kevin on di gareja na sogot. Gabe partohap ma ibana di harajaon ni Tuhanta, jala goaron ma ibana sada halak Kristen.

Di silas ni rohanta i, dison huboan hami do kado sipasahatonnami tu si Kevin on. Unang bereng hamu uli dohot argana, alai na patuduhon las ni rohanami do on. Tung na songon dia pe on nuaeng, las ma rohamuna manjalo. Botima.

(Molo adong dope boru na naeng mangalehon kado, langsung ma dipasahat, ndang pola be marhata sigabe gabe, holan didok ma) : Las ma rohamu manjalo kado on. Sai Tuhanta ma na mangaramoti hamu. Botima.

27. Hata tangiang/gabe gabel pasu-pasu sian Tulang ni Suhut.

Parjolo ma hita mandok mauliate tu Tuhanta, ai marhite asi dohot holong ni roha-Na, nunga saut pahompunami on manjalo padidion na badia sian Tuhanta marhite naposo-Na di gareja na sogot. Mauliate ma di Tuhanta, al goaron ma pahompunami si Kevin on gabe sada halak Kristen, jala sipartohap di harajaon ni Tuhan Debata. Di silas ni rohanami i, ro do hami Tulangmuna laho pasahathon ulos parompa tu pahompunami si Kevin on, songon dalannami martangiang tu Tuhanta, asa dilehon hahipason jala simbur magodang ibana, gabe anak na hasea, anak na bisuk pasu-pasuon ni Tuhanta. Tung songon on pe ulos na hupasahat hami on, las ma rohamuna manjalo. Songon hata ni natua-tua ma dohonon:

Marbatu ma singkoru, marpulung ia palia,

Sian pulungna i ro parbuena, Dung sorang anak manang boru,

Boanoan ma i tu pandidion na badia, Laos disi mangalap goarna.

Tubu ma tambinsu di dolok ni Sipoholon,

Gabe anak na bisuk ma ibana, anak sipatujoloon.

Dolok ni Janjimaul hatubuan ni si marhora-hora,

Goar na ul ma goamna i, donganna gabe donganna mamara.

Botima.

(Molo adong dope uduran ni tulang, ima dongan tubu dohoi bon na naeng mangalehon ulos parompa manang kado, langsung dipasahat, jala ndang pola be marhata sigabe gabe. alai didor ma). Las ma rohamu manjalo ulos parompal kado on. Sai Tuhanta ma na mangaramoti huhut mamasu-masu hamu. Botima.

28. Parhata Ni Suhut

Di hamu horong ni Hula hulanami! Paima so huampu hami hata na uli, hata na denggan na pinasahatmuna tu hami, lehon hamu ma jolo tingki di hami laho pasahathon sipalas roha dohot pasituak na tonggi tu hamu sude Hula hulanami. Botima.

29. Parhata ni Hula hula

Na denggan angkup ni na uli Amangboru! Nunga rade hari pasahat hamu ma.

30. Hata sidohonon ni Boru/Hela tingki pasahat pasituak na tonggi.

(Borhat ma Ama ni Kevin dohot Inantai, pasahathon siparas roha tu Simatuana/ Tungganena, dohot pasituak na tonggi tu sude uduran ni hula hula.)

Di hamu Omak, dohot Bapak, tung so sadia pe na hupasahat hami on, las ma rohamuna manjalo. Gogo Omak dohot Bapak martangiang tu Tuhanta, asa lam ditambai di hami pansarian pansamotan, asa adong bahenonnami laho pagodang-godang pahompumuna on jala asa umbalga muse lehononnami tu hamu. Botima. (Laos di jalanghon ma tu Amanta/Inanta i sipalas roha, huhut di pasahat nasida ma pasituak na tonggi tu sude uduran ni hula hula)

31. Hata Pangampuon sian Hasuhuton.

Hata pangampuon sian Ompung Suhut / Paidua ni suhut.

Di hamu angka Amanta Raja dohot Inanta Soripada, ro di sude hamu na hupio/huontang hami, dongan sabutuha, boru/bere dongan sahuta, dongan sahuria, tartumobi di Hula hulanami

Marsomba ma hami dohot jari-jari sampulu, pasampulusadahon si manjujung di hamu angka na huparsangapi hami, dohononnami ma mauliate malambok pusu di sude hata na uli, hata na denggan na ni lehonmuna tu hami, lumobi di keluarga ni anaknami di jabu on. Ndang na tarbalos hami i Rajanami tu hamu, alai tangkas do huboto hami, na rade do Amanta Debata Pardenggan basa i mangalehon pasu-pasu-Na tu hamu na manghaholongi hami. Jadi pos do rohanami, sai na jaloonmuna do i muse marlipat ganda sian Tuhanta Debata balos ni na denggan naung hujalo hami sian hamu di bagasan sadari on. Sai songon hata ni umpasa ma dohonon di hata na uli, hata na denggan dohot pasu-pasu na pinasahatmuna tu hami:

Turtu ma ninna anduhur, tio ma ninna lote,

Hata na uli dohot hata pasu-pasumuna i, sa unang muba, unang mose.

Sai ampe mai di parsalimbubuannami, tuak di abranami jala ampu di abingannami, tarlumobi di keluarga ni anaknami di jabu on Laos mauliate do nang dohononnami di siala angka ulos parompa dohot kado na pinasahatmuna tu pahompunami, sai siboan hahipason ma i antong di ibana tumpahon ni Tuhanta Debata. (Didompakhon tu anak dohot parumaen) Onpe ale anaha, Ama ni Kevin, dohot Parumaen, ampu hamu ma hata na uli, hata na denggan dohot pasu-pasu na pinasahat ni angka tuturta dohot Hula hulanta. Botima.

32. Hata pangampuon sian natoras ni na tardidi.

Di hamu Hula hulanami dohotuduranmuna, dongan sabutuhanami, boru/berenami, dongan sahutanami dohot dongan sahurianami. Mauliate godang ma tapasahat tu Tuhanta ala dilehon do tingki na denggan on di hita. Mauliate ma dohononnami tu hamu sude na huparsangapi hami, Amanta Raja dohot Inanta Soripada di haradeon ni rohamuna, marneang ni langka hamu ro mangadopi ulaon las ni roha on, i ma na mangupa anaknami na manjalo pandidion na badia sian Tuhanta marhite naposo-Na di bagas joro ni Tuhanta na sogot Mauliate ma hupasahat hami tu hamu Hula hulanami na pasahathon dengke sitio-tio, dengke simudur-udur, dengke saur, dengke sahat Suang songoni dipasahat hamu do dohot ulos parompa di anaknami, pahompuna si Kevin on, nang dohot angka kado tarlumobi di hata pasu-pasu pe.

Sai manjangkon ma badan dohot tondinami di na uli na denggan na pinasahatmuna, tarlumobi di anaknami. Ndang tarbalos ham na uli na denggan na pinasahatmuna tu hami, tarlumobi tu pahompuna si Kevin on, sai sian Tuhanta ma jalo hamu balosna marlipat ganda. Sai dilehon Tuhanta ma di hamu ganjang ni umur dohot hahipason, asa sai adong hamu mamoda modai jala mamasu-masu hami ianakhonmuna.

Songoni nang di hamu dongan sabutuhanami, dongan sahutanami, dongan sahurianami nang dohot di borul berenami. Mauliate godang ma hupasahat hami tu hamu. Ndang na saut ulaon on ianggo so ala ni pangurupionmuna.

Angka sibahenon dohot gogomuna, na pinasahatmuna tu hami tarlumobi hata poda dohot tangiang nang dohot pasu-pasu, sai anggiat ma di pasaut Tuhanta songon na nidokmuna i. Ndang tarbalos hami sude uli basamuna Amang Raja dohot Inang Soripada, sai sian Tuhanta ma jalo hamuna balosna marlipat ganda. Botima.

33. Parhata Ni Suhut

Nunga be huampu hami hata na uli hata na denggan Rajanami! On pe ninna rohanami, hamu Hula hulanami ma mambahen tangiang panutup di ulaonta on. Botima.

34. Parhata ni Hula hula

Na denggan angkup ni na uli Amangboru! (Didompakhon tu sahalak dongan tubu ni hula hula na berpredikat Sintua) Ho ma Amanguda manutup ulaonta on marhite-hite ende dohot tangiang Botima,

(Dung sidung martangiang, masijalangan huhut marhehe na uli)