Pataru Aek Ni Unte

1. Pangaradeon.

(Parhata ni hasuhuton mangatur parhundul ni dongan tubu, boru dongan sahuta dohot hula hula.)

2. Suhut Paidua.

Di hamu Raja ni dongan tubu, Raja ni boru/ bere, dongan sahuta, tar lumobi di hamu Raja ni Hula hulanami, ala nunga dapat tingkina, naeng mulaanta ma ulaonta, masuk ma hamu Rajanami. Parhundulta tarsongon on ma nian: Hasuhuton dohot na mardongan tubu di bona jabu ma jala Hula hulanami di uluan ni jabu ma, asa masidompakhan dohot hasuhuton. Dongan sahutanami di sabola siamun ni hasuhuton ma, Boru di sabala hambirang ni hasuhuton, asa pintor hatop marhobas.

3. Hata huhuasi sian Paranak

Di hamu Raja ni Hula hulanami! Mauliate godang ma tapasahat tu Tuhanta Debata, ala ni pangaramotion-Na marhahipason do hamu ro mandapothon hami di jabunta na marampang na marjual on, suang songon i nang hami pe marhahipason do didapot hamu. Jala hami pe ndang lupa mandok mauliate godang tu hamu Raja ni Hula hulanami na ro mandapothon hami. Di bagasan las ni roha dohot serep ni roha, manungkun ma hami, aha ma sintuhu ni haroromuna Rajanami. Botima.

4. Sintuhu haroro ni hula hula.

Parhata ni Hula hula

Gabe ma jala horas Amangboru! I do tutu, tama do hita mandok mauliate tu Tuhanta, marhite asi dohot holong ni roha-Na boi hita pajumpang di bagasan hahipason dohot las ni roha di jabunta na marampang na marjual on, sigomgom nasa pangisina. Alusan ma tutu sungkun-sungkumuna i Amangboru, la sintuhu ni haroronami Amangboru, i ma di las ni rohanami diparsorang ni pahompu/ berenami, i ma anak buha baju di borunami di jabuon, laho pasahathon aek ni unte tu Borunami dohot tu Helanami, dohot pasahat ulos parompa tu pahompunami. Botima Amangboru.

5. Parhata ni Paranak

Na denggan ma angkup ni na uli Raja ni Hula hulanami! On pe Rajanami, hupasahat hami ma tingki tu hamu. Botima.

6. Hata sidohonon ni hula hula tingki pasahat dengke.

(Ompung Bao/ tulang pataruhon aek ni unte dohot dengke sitio-tio di atas piring oval (talam), bangun-bangun nang dohot pasahat ulos parompa tu pahompu anak buha baju ni boruna.)

Di ho Inang, boru hasian,songoni di Helanami dohot pahompunami, nang di hamu sude na mardongan tubu, mandok mauliate godang ma hita tu Tuhanta, ai ala holong ni roha-Na do na mambasa-basahon sada dakdanak buha baju di ho, di hamu, di hita, i ma pahompunami on. Hipas do na ro, hipas do na nidapotna. Di las ni rohanta i, ro do hami pasahathon aek ni unte, dengke sitio-tio, sai tio ma parsaulian, parhorasan di hamu. Dengke simudur-udur, sai rap marudur ma hamu tu dolok tu toruan.

Sai simbur magodang pahompunami on, gabe anak na pistar anak na malo, anak sibulang-bulangan donganmuna saurmatua, Songon nidok ni sijolo-jolo tubu:

Rutruton golang-golang, ulluson pura-pura,

Sai simbur ma ibana laho magodang, pengpeng laho matua.

Dangka ni hariara, tanggo pinagait-aithon,

Simbur magodang ma ibana, sitongka panahit-nahiton.

Manalu Rumagorga, haha ni Rumaijuk,

Sai anak na malo marroha ma ibana, na pistar jala na bisuk.

(Diuloshon ma ulos parompa i tu pahompuna sian jolo di abingan ni natorasna boru).

Di ho pahompu hasian, on ma ulos parompam, asa simbur magodang ma ho hasian, anak na malo jala na bisuk tu joloan on Ulos mangiring do on, asa mangiring ibotom dohot anggim tu ari na naeng ro (Dibuat ma boras pir. Parjolo ma dibahen tu simanjujungna boras sipir ni tondi 1, i pe asa dibahen tu parsalimbubuan ni boru, hela dohot tu pahompu, nang dohot tu Ompung Suhut, molo adong do disi. Dung i ditaburhon tu ginjang tolu halijala didok ma hatana):

Pir ma pongki, bahul-bahul pansalongan,

Pirma tondi, sai ro ma parsaulian.

Pir ma tondim Boru hasian, sai Tuhanta ma na mandongani ho Boru hasian, di hamu pe Hela, pir ma tondimuna pasu-pasuon ni Tuhanta i, suang songoni ho pahompungku, pirma tondim, simbur magodang ma ho jala pengpeng saur matua ditumpak asi dohot holong ni roha ni Tuhanta i. Huhorasi ma hamu Boru hasian, Hela, pahompunami dohot nang hita sasudena marhite boras si pir ni tondi: Pir tondi madingin, horas tondi matogu pasu-pasuon ni Tuhanta. Horas! Horas! Horas!!!

7. Parhata ni Hula hula

Di hamu Raja ni Parboruonnami! Nunga hupasahat hami be sipasahatonnami, on pe hupasat hami ma acara tu hamu. Botima.

8. Parhata ni Paranak

Gabe ma jala horas Raja ni Hula hulanami! Mangido mangelek ma hami Rajanami, naeng pasahat tudu tudu ni sipanganon songon tanda las ni rohanami tu hamu. Tu jolo ni ise ma hupasahat hami. Botima.

9. Parhata ni Hula hula

Na denggan angkup ni na uli Amangboru! Nunga rade hami, tu jolo ni Ompung Baona on ma pasahat hamu. Botima.

10. Hata sidohonon ni paranak tingki pasahat tudu tudu ni sipanganon.

(Pasahat tudu tudu ni sipanganon Ompung suhut, anak dohot Parumaen)

Di hamu Tunggane, Inang Bao dohot sude hamu uduran ni Hula hulanamil Di son ro do hami pasahathon tudu tudu ni sipanganon on tu hamu songon tanda las ni rohanami tu hamu. Tung songon on pe nuaeng sipanganon on, las ma rohamuna manjalo. Ndang na mangholit hami, ai tangkas do huboto hami, songon na mandanggurhon tu dolok do mangalehon tu hula hula. Jadi onpe Rajanami, songon hata ni situa-tua ma dohononnami:

Bagot na marhalto ma na, tubu di robean

Horas ma hamu na manjalo, lam tu tambana di hami na mangalean.

 Botima. (disalami ma hula hula)

11. Parhata ni Hula hula

Di hamu Raja ni Parboruonnamil Ninna rohanami, ala hamu do na parade sipanganonta, sian hamu ma na mambahen tangiang laho mangan. Botima.

12. Parhata ni Paranaki

Na denggan angkup ni na uli Rajanamil Ho ma Amanguda/ Amangtua, bahen ma tangiangta laho mangan. Di hamu Raja ni Hula hulanami, dongan tubu, boru bere dohot dongan sahutanami, paima so dibahen Amanguda/Amangtua on tangiang laho mangan porlu paboaonnami, ia parmanganonta, sistem paresmanan do, manang masibuat/masiantan Botima.

13. Siboan Tangiang

(Dung sae martangiang laho mangan, didok siboan tangiang ma hata ni sipanganon)

Siti sigompa, golang pangarahutna,

Tung so sadia pe na tupa, sai godang ma pinasuna

Marjomuk ma hita.

(Boru hasuhuton maneati aliang-aliang, ate-ate dohot butuha raja jala dibagihon tu hula hula, dohot tu dongan sahuta nang dohot tu sude angka na pinio)

14. Parhata ni Hula hula

(Dung sae mangan, parhata ni hula hula mamungka pangkataion):

Di hamu Amangboru! Nunga diadophon hamu tu hami tudu tuduni sipanganon on, na manungkun ma hami tu hamu, tarsongon dia ma parpeak ni tudu tudu ni sipanganon on. Botima, Amangboru.

15. Parhata ni Paranak

Gabe ma jala horas Raja ni Hula hulanami! Alusan ma tutu sungkun ni Raja i, taringot tu tudu tudu ni sipanganon na hupasanat hami tu hamu, surung-surungmuna do i Rajanami Botima.

16. Parhata ni Hula hula

Na denggan angku ni na uli Amangboru! Surung-surungnami do hae tudu tudu ni sipanganon on. Mauliate ma hupasanat hami tu hamu Amanngboru!

(Didomakhon tu boru uduran ni hula hula) Di hamu borunami boan hamu ma jolo tu dapur tudu tudu ni sianganon on, asa pintor bagi hamu huhut bungkusu hamu. Lehon hamu ma annon dung sidung hita manghatai, tu angka na patut manjalo. 

Di hamu Amangborunami! On pe hupasahat hami ma tu hamu panghataion. Botima.

17. Parhata ni Paranak

Mauliate ma di hamu Raja ni Hula hulanami! Nunga tutu dipasahat hamu aek ni unte dohot dengke sito-tio nang dohot ulos parompa tu pahompunta nangkinon, alai laos na mangido dope hami tu hamu, asa lehon hamu angka hata sigabe gabe, dohot hata pasu- pasu tu hami, tarlumobitu Borumuna, Helamuna dohot pahompunta, Botima.

18. Parhata ni Hula hula

Na denggan angkup ni na uli Amangboru! Tar songon on ma nian partording ni ulaonta di na laho pasahat hata sigabe gabe, dohot hata pasu-pasu. Hami uduran ni hula hula ma parjolo pasahathon hata sigabe gabe, baru pe muse asa tu hamu Amangborunami dohot uduranmuna mangampu. Beha rohamuna Amangboru.

19. Parhata ni Paranak

Na denggan angkup ni na uli Rajanami!

20. Hata sigabe gabe dohot hata pasu-pasu sian Hula hula.

Parhata ni Hula hula

Mauliate ma Amangboru! On pe di hita uduran ni hula hula, tarsongon on ma partording ni hita mandok hata sigabe gabe, hata pasu-pasu. Parjolo ma hamu boru/bere, diuduti sada sian Ina, sada sian hita na mardongan tubu, baru pe pinasahat tu Amanta/Inanta Ompung Bao.

21. Hata sigabe gabe sian Boru.

Parjolo ma hita mandok mauliate tu Tuhanta, ala asi ni roha-Na na mangiring-iring hita, boi pajumpang di bagasan hahipason di ari na uli, ari na denggan on.

Di hamu Omak ni si Ucok dohot di Anakniba! Las ma rohanta, ai nunga sorang sada dakdanak, buha baju di hamu. Hipas hita na ni dapot, hipas dakdanak na taharoani on. Alai di hamu maen, Omak ni si Ucok dohot di Anakniba, sai denggan-denggan urus dohor didik hamu si Ucok on, asa simbur magodang ibana. Gogo hamu mangalului sipanganon ni si Ucok on, asa adong sipanganonna, tarlumobi makanan yang bergizi, asa gabe anak na pistar, anak na malo huhut na bisuk ibana muse, songon hata ni natua-tua:

Tubu ma tambinsu di bona ni pinasa,

Sai gabe anak na bisuk ma ibana, jala anak na uli basa.

Hatop boan hamu tu gareja, asa pintor tardidi ibana. Songoni ma jolo hata sian hami. Hatanamii, hata sitambaan. Botima.

22. Hata sigabe gabe dohot pasu-pasu sian paniaran ni dongan tubu.

I do tutu, las ma rohanta, ai di ari na uli, ari na dengan on, nungga dapat hita na taparsinta, i ma di parsorang ni si Ucok on Hipas do hita na nidapotna, hipas Ibana so haribo-riboan, jala marias ni roha, denggan mardalan ulaonnta sadari on. On pe Boru hasioan, Omak ni si Ucok, dohot Helanami, denggan- denggan ma urus dohot didik hamu si Ucok on, asa simbur magodang ibana huhut anak na pistar, anak na malo dohot na bisuk tu joloan ni ari on. Diboto ibana pasangaphon natua-tua, tarlumobi pasangap Tuhan Debata. Sai tibu si Ucok on martinodohon anak dohot boru donganmuna, donganta saurmatua. Songon hata ni umpasa natua-tua ma dokhonon:

Dangka ni hariara ma, tanggo pinangait-ngaithon,

Simbur magodang ma si Ucok on, sitongka panahit-nahiton.

Tubu ma tambinsu di dolok ni Sipoholon,

Sai gabe anak na bisuk ma ibana, anak sipatujoloon

Tubuan laklak, tubuan singkoru di dolok ni Purbatu,

Sai tumodohon anak dohot boru ma ibana, donganmuna saurmatua.

Sahat-sahat ni solu sai sahat ma tu bontean,

Sai leleng ma hita mangolu, sahat tu parhorasan Panggabean.

Songon na ni dok ni borunami nangkin, hatop boan hamu ibana tu bagas joro ni Tuhanta, tu gareja, asa tardidi ibana tu bagas goar ni Tuhanta. Botima. Hatanami i, hata si tambaan.

23. Hata sigabe gabe dohot pasu-pasu sian dongan tubu.

Pinuji pinasangap ma Tuhanta Debata, na mangalehon pasu-pasu na godang tu hita be. Anggo ahu Boru hasian, dohot Helaniba, ndang godang be sidohonon tu hamu, ai nunga singkop dihatahon Borunami dohot Inanta nangkin. Holan na mangondolhon nama ahu, asa momos tiop hamu jala ulahon hamu poda ni Borunami, Paribanmuna, dohot Inanta nangkin, i ma asa denggan urus hamu sipanganon dohot penididikan ni si Ucok on. Hatop padidihon hamu tu bagasan Goar ni Tuhanta. Sai marsada ni roha huhut masipaolo-oloan hamu Boru dohot hamu

Hela laho marmudu-mudu pahompunami si Ucok on. Sai gogo hamu mansari, asa adong bahenonmuna laho pagodang- godangkon dohot mandidik si Ucok on. Martangiang hamu tu Tuhanta, asa dilehon gogo dohot bisuk nang angka pasu-pasu-Na tu hamu. On pe Boru hasian dohot Helanami, sai martinodohon anak dohot boru ma si Ucok on, donganmuna, donganta saurmatua. Songon hata ni situa-tua ma dohonon:

Tubuan laklak, tubuan singkoru di dolok ni purbatua,

Saimartinodohon anak dohot boru ma ibana

donganta saurmatua

Asa Tuhanta ma na mangiring-iring dohot na marorot hita, songon hata ni situa-tua:

Eme sitamba tua, parasaran ni siborok,

Debata do na martua, sai sude ma hita diparoro

Huujungi ma hatangkon:

Sahat-sahat ni solu, sai sahat ma tu bontean,

Si sahat ma hita leleng mangolu, sahat tu parhorasan panggabean

Botima.

24. Hata sigabe gabe dohot pasu-pasu sian Ompung Bao.

Mauliate godang ma tapasahat tu Tuhanta Parasi roha boloni. Ai marhite-hite asi ni roha Na boi hita pajumpang di bagasan hahipason dohot las ni roha di bagas na marampang na marjual on. Tariumobi dibasa-basahon Tuhanta do di boru dohot helanami sada dakdanak buha baju.

Di las ni rohanta manjalo basa-basa na sian Tuhanta, ro do hami pataru aek ni unte, dengke sitio-tio, asa sai tio ma parsaulian parhorasan di hamu. Dengke simudur-udur, asa sai marudur udur hamu tu dolok tu toruan, sahata saoloan laho mangurus dohor mandidik pahompunami si Ucok on. Dengke sahat, sai sahat ma na taparsinta, sahat ma di hita na uli dohot na denggan. Songon hata ni situa-tua,

Pinta-pinta sori mandapot,

Sai i na taparsinta tu si Ucok on, sai i ma dapot.

Nunga hupasanat hami nangkin ulos parompa ni si Ucok, sa simbur magodang maibana mamangke parompanai, jala martinodohon anak dohot boru si Ucok on muse dipasu-pasu Tuhanta. Songon hata ni umpasa:

Tubuan lak-lak ma, tubuan singkoru, di dolok ni Purbatua,

Martinodohon anak donot boru ma si Ucok on, donganta saurmatua.

Sai gabe anak na pistar, anak na malo jala anak na bisuk, anak sibulang-bulangan huhut na olo pasangap orangtua, tarlumobi pasangaphon Tuhanta Debata. Jala huujungi ma hata on dohot hata ni situa-tua:

Sahat-sahat ni solu, sai sahat ma tu bontean.

Sai sahat ma hita leleng mangolu, sahat tu parhorasan

sahat tu panggabean.

Botima.

25. Parhata ni Hula hula

Gabe ma jala horas Amangboru! Nunga marliat-liat hami pasahathon hata sigabe gabe dohot hata pasu-pasu. On pe ampu hamu ma Amangboru. Songon hata ni ompunta sijolo-jolo tubu

Naung sampulu pitu, jumadi sampulu alu,

Hata tangiang, hata pasu-pasu na hupasahat hamii,

ampu hamu ma i di tonga ni jabu.

Botima

26. Parhata ni Paranak

Di hamu Raja ni Hula hulanami! Di siala las ni rohanami manjalo haroromuna, marnatampak hamu rap dohot Inanta Soripada pataruhon aek ni unte tu pahompunta on asa jolo hupasanat hami nian sipalas roha (batu ni sulang) dohot pasituak na tonggi tu hamu sude Rajanami, dungi pe asa huampu hami hata sigabe gabe dohot hata pasu-pasu na pinasahatmuna tu hami Mangarade ma hamu Rajanami, asa ro hami. Botima.

27. Parhata ni Hula hula

Na denggan angkup ni na uli Amangboru! Nunga rade hami. Pasahat hamu ma.

28. Hata ni Boru/Hela tingki pasahat pasituak na tonggi.

Di hamu Omak, dohot Bapak, tung so sadia pe na hupasahat hami on, las ma rohamuna manjalo. Gogo Omak dohot Bapak martangiang tu Tuhanta, asa lam ditambai Tuhanta di hami pansarian pansamotan, asa adong bahenonnami laho pagodang- godang pahompumuna on, jala asa umbalga muse lehononnami tu hamu. Botima. [Laos di jalanghon ma tu Amanta/inanta i sipalas roha (batu ni sulang), huhut di pasahat nasida ma pasituak na tonggi tu sude uduran ni hula hula]

29. Hata Pangampuon sian Paranak

Parhata ni Paranak

Gabe ma jala horas Raja ni Hula hulanami! (Didompakhon tu horong ni hasuhuton, boru dohot dongan sahuta): Na mangampu do hita nuaeng. Ninna rohanian, parjolo ma mangampu sian boru, baru pe asa dongan sahuta, jala dung i mangampu ma suhut. Botima.

30. Hata Pangampuon sian Boru.

Mauliate godang ma hupasahat tu Tuhanta, suang songon i nang tu hamu Hula hula ni Hula hulanami, naung mangalehon angka uli basa, i ma angka pasu-pasu dohot hata poda tu hami, tarlumobi tu paramaannami si Ucok on. Sai asi ma roha ni Tuhanta, sai tuak ma i di abaranami, ampe di parsalimbubuannami ma angka pasu- pasu na pinasahatmuna tu hami. Asi ma roha ni Tuhanta, sai dilehon ma di hamu ganjang ni umur dohot hahipason tu joloan ni ari on. Botima.

31. Hata pangampuon sian Dongan Sahuta.

Mauliate ma di Tuhanta na mandongani hita di ulaonta sadari on Hami pe antong mandok mauliate do tu hamu hasusuhutonnami dohot hami di gokhon hamu mangadopi di na ro Hula hulanta pataru aek ni unte. Songon hata ni umpasa :

Poltak bulan tula, siraja manggule,

Manjalo pasu-pasu hasuhuton, dohot hami mahulae.

On pe angka hata pasu-pasu na pinasahat ni Hula hulanta, taampu ma i di tonga jabu. Songon hata ni umpasa ma dohonon:

Aek marjullak-jullak, marjullak sian batu,

jullak-jullakna i binahen tu tabu-tabu,

Hata pasu-pasu, hata sigabe gabe sian hula hulanta,

huampu hami ma i di tonga jabu

Songon hata ni ompunta sijolo-jolo tubu:

Songgop siruba-ruba tu dangka ni hapadan,

Hata pasu-pasumuna i, sai dijangkon tondi ma i dohot badan.

Botima.

32. Hata pangampuon sian Dongan tubu.

Mauliate ma di hamu Raja ni Hula hulanami! Nunga nangkin dipasahat hamu aek ni unte, dengke sitio-tio, dohot ulos parompa tu pahompunta nang dohot hata pasu-pasu, hata tangiang tu hami. Dohononnami ma antong songon nidok ni natua-tua:

Naung sampulu pitu, jumadi sampulu alu,

Hata pasu-pasu dohot tangiangmuna i,

huampu hami ma i di tonga jabu.

Di na laho mulak pe hamu annon sian bagasnami on, sai Tuhanta ma na manogu-nogu hamu di pardalanan sahat tu jabumuna be. Suang songoni , hami na tading pe di jabu on, sai horas-horas ma di pasu-pasu Tuhanta i. Botima.

33. Hata pangampuon sian Ompung Suhut.

Mauliate ma tapasahat tu Tuhanta, na mandongani hita di ulaonta sadari on. Maulite godang do pasahatonnami tu hamu Hula hulanami, di uli basamuna na ro pataruhon aek ni unte tu parumaen, anak dohot pahompunta. Nunga di pasahat hamu dengke sitio-tio, dengke simudur-udur, dengke sahat, songoni ulos parompa ni pahompunta. Tambana muse, dilehon hamu do hata pasu-pasu, hata sigabe gabe dohot tangiang tu hami, tarlumobi tu pahompunta si Ucok on. Sai martinangi ma Tuhanta Debata, sai disanaphon ma i tu ibana, asa gabe anak na bisuk, anak na malo, anak na uli basa, anak sipartogi huhut sipasangap orangtua, tarlumobi sipasangap Tuhanta. On pe Rajanami, songon hata ni umpasa ma dohonon:

Turtu ma ninna anduhur, tio ma ninna lote,

Pasu-pasu na pinasahatmuna i sai unang muba, unang mose,

Ndang tarbalos hami denggan basamuna i Rajanami, sai sian Tuhanta ma jalo hamu balosna. Tangiangnami, sai dilehon Tuhanta ma di hamu ganjang ni umur dohot haipason. Botima

34. Hata pangampuon sian Omak ni si Ucok/si Butet.

Mauliate ma di Tuhanta, na sai tongtong mandongani huhut mangaramoti hita. Jala mauliate do hupasahat tu hamu sude hula hulanami, naung pasahathon aek ni unte dohot dengke sitio-tio nang dohot ulos parompa ni si Ucok. Ndang tarbalos hami uli basamuna i Raja ni Hula hulanami. Sian Tuhanta ma jalo hamu balosna marlipat ganda. Di tangiangnami, sai dilehon Tuhanta ma hahipason dohot ganjang ni umur di hamu sude Hula hulanghu dohot Paribanhu. Botima.

35. Hata pangampuon sian Bapak ni si Ucok/si Butet.

Mauliate godang ma tapasahat tu Tuhanta, ala didongani asi ni roha-Na do hita tongtong. Jala mauliate ma hupasanat hami tu hamu Raja ni Hula hulanami, na ro hamu marnatampak dohot Inanta Soripada pataruhon aek ni unte. Nunga dipasahat hamu dengke sitio-tio, dengke simudur-udur, dengke sahat, sahat ma tutu na uli, na denggan tu hita, tarlumobi tu pahompumuna on Dipasahat namu do ulos parompa ni si Uncok on, mardongan pasu-pasu dohot tangiang tu ibana nang dohot tu hami. Sal asime roha ni Tuhanta, sai disahaphon ma i tu hami. Tuak ma di abara ampe di parsalimbubuannami. Uli basamuna i Rajanami, ndang tarbalos hami i. Sai sian Tuhanta ma jalo hamu balosna na marlipat ganda. Dilehon Tuhanta ma di hamu ganjang ni umu dohot hahipason. Botima.

36. Parhata ni Paranak

Nunga be Rajanami huampu hami hata pasu-pasu dohot tangiang na pinasahatmuna tu hami. On pe songon na mangujungi ulaonta Rajanami, sian hamu ma tangiang panutup. Botima.

37. Parhata ni Hula hula

Na denggan angkup ni na uli Amangboru! (Didompakhon tu sahalak sian dongan sabutuha) Ho ma haha doli mambahen tangiang panutup di ulaonta on. Botima. (Dung sidung martangiang, marsijalangan ma jala marhehe na uli Jambar juhut na naung dibungkusi hian, dilehon ma tu uduran ni hula hula).