Ulos Tondi

1. Pangaradeon.

{Dung ro sude angka na nipio (diundang) laho mangadopi ulaon laho pasahat ulos tondi manang ulos mula gabe, diatur parhata ni Paranak ma parhundul nasida. Hasuhuton Paranak hundul ma di jabu bona, uduran ni hula hula hundul di luan ni jabu Hasuhuton masidompak- dompahan dohot uduran ni hula hula.}

2. Hata huhuasi sian Suhut Paidua ni Paranak

Mauliate ma parjolo tapasahat tu Tuhanta, ala marhite asi ni roha- Na marhahipason hamu dohot uduranmuna ro mandapothon hami. Hami pe hipas do didapot hamu: Mansai las situtu rohanami, Rajanami di hahororomuna on. Tung sude do hami na mardongan tubu, boru dohot dongan sahutanami marlas ni roha manjalo haroromuna, Rajanami.

Parjolo ma hami marsomba dohot jari-jari sampulu, pasampulu sada simanjujung ma hami diangka hata na naeng sidohonon, molo tung adong angka na marhurang lobi. Nuaeng marnatampak hamu na mardongan tubu dohot inanta soripada, udur dohot borumuna. Tarsongon dia ma hinarohon ni Raja i? Songon i ma jolo hatanami.

3. Sintuhu ni haroro ni hula hula (Parboru).

Horas ma jala gabe Raja ni Boru! Hami pe antong mandok mauliate do tu Tuhanta, marhite pangiring-iringin-Na marhahipason do hamu hudapot hami, suang songoni marhahipason do Borunami dohot Helanami. 

Sai asi ma roha ni Tuhanta, sai dilehon di hita saluhutna hahipason ni daging dohot tondi tu joloan ni ari on, asa boi hita masitomuan di bagasan las ni roha.

Taringot ni sungkun-sungkunmuna i, Raja ni Boru, i ma taringot ni sintuhu ni haroronami, silas ni roha do Raja ni Boru. Saminggu na salpu, ro do boa-boa silas ni roha sian suruan ni Helanami tu hami naung ditongos Tuhanta di nasida, di hita, na taparsinta, i ma naung manggora pamuro di borunami. 

Hombar tusi ma haroronami Raja ni Boru, naeng pasahathon ulos tondi, manang ulos mula gabe ma hami tu Borunami dohot Helanami.

4. Parhata ni Paranak

Mauliate ma jala malambok pusu ma hupasahat hami tu hamu Hula hulanami. Mansai balga jala las situtu rohanami, ai naeng pasahat ulos tondi, manang ulos mula gabe do hape hamu Rajanami tu parumaen dohot anaknami. On pe Raja ni Hula hula, hupasahat hami ma tingkitu hamu, pasahat hamu ma sipasahatonmuna tu Borumuna dohot Helamuna. Botima Rajan Hula hula. 

(Parboru jongjong mandapothon boru dohot hela na hundul di lage manang kursi laho pasahathon upa-upa, ulos tondi dohot boras sipir ni tondi)

5. Hata Sidohonon ni Simatua-Boru tingki mangupa.

Di ho Inang, borungku dohot di hamu Amang Hela. Dison hupasahat hami ma tu hamu indahan na las dohot dengke sitio-tio, songon upa-upa di hamu. Asa ro ma angka na tio di hamu na dua tu joloan ni ari on jala tiur ma haroan na tanaima-ima. On ma Inang, boru hasian sipanganon sinoloman ni roham, na dipangido ho sian hami. (Somalna manuk na pinanggang, dengke na niura, babi panggang, padar, manang lomang/itak gurgur) Tung songoni pe nuaeng dengke na hupasahat hami on, las ma rohamuna manganhon (Dung i disulanghon inanta ma indahan rap dohot dengke tolu hali tu boruna i, dungi dipaimunhon ma muse aek sitio-tio, laos didok ma. Alai nuaeng on ndang apala sai disulangi be dohot tangan manang sendok, cukup ma holan dipasahat di pining i). Asi ma rohani Tuhanta, sai tiur-tiur haroan na tapaima- ima. Horas ma na nipaima, horas ma hita na paimahon. Botima.

6. Hata Sidohonon ni Simatua -Doli tingki pasahat Ulos Tondi.

Nunga dipasahat Inanta nangkin tu ho Inang dohot hamu Hela upa-upamuna, i ma indahan na las dohot dengke sitio-tio. 

Di ho inang, borungku dohot di hamu Hela. Nuaeng hupasahat ma ulos tondi on tu ho Inang dohot hamu Hela (Laos diuloshon ma ulos i sian siamun tu hambirang ni na niulosani jala diurupi inanta ma patipakhon asa unang hona tu simanjujung nasida. Jala didok ma hatana):

On ma ulos tondi di ho Inang, boru hasian dohot di hamu Amang Hela. Ulos naung nirasian do on, asa anggiat sarasi badan dohot tondimuna, asa marrongkap gabe marrongkap mamora ma hamu mamangke ulos on. Ulos mula gabe ma di hamu ulos on, asa tangkas haroan marharoanan siampu-ampuonmuna jala situak. tuakonmuna tu joloan ni ari on. Ulos tondi parmulaanmuna gabe ma on, mangulosi anak dohot boru ma on di hamu.

Sai tibu ma sorang haroan na tapaima-ima di ari na uli dia ari na denggan, so hariboriboan, asa marurat hamu tu toru, jala marbulung tu ginjang, mangerbang mangalaung tu lambung. Songon hata ni umpasa :

Togu urat ni ri, togu do nang urat ni singkoru,

Ulos tondi na hupasahati, sai saur mai di hamu, mangulosi

anak dohot boru.

Tubu ma lata di toru ni Tarabunga,

Sai tubu ma di hamu anak na marsangap dohot boru siboan tua.

Sahat-sahat ni solu, sahat ma tu bontean,

Sahat ma hamu leleng mangolu, sahat tu parhorasan panggabean.

(Dung i dibuat amanta i ma muse boras sipir ni tondi sian pinggan naung diparade hian, laos didok ma):

Pir do pongki, bahul-bahul pansalongan,

Sai pirma tondi, sai ro angka parsaulian

Pir ma tondi madingin, horas tondi matogu. (Parjolo ma dibahen amanta i tu simanjujungna, baru pe asa tu parsalimbubuan boruna, dungi tu parsalimbubuan ni helana, jala didok ma muse) Pirma tondim boru hasian. Dao ma sahit sian badan dohot sahitni pingkiran sian ho, asa tulus na taparsinta i jaloonmuna. Horas ma na ro, horas ma hita na paimahon. (Laos songon i ma muse dibahen tu helana). On ma boras pir liat-liat tu hamu Parboruonnami. (Dung i dihorashon tolu hali tu ginjang jala didok ma) Horas, horas, horas ma hita saluhutna! (Disalam Parboru ma boruna, dohot helana)

(Laos dipasahat ma muse dengke sitio-tio tu jolo ni suhut Paranak, boru dohot hela, jala didok ma): Di hamu Lae, Ito, Hela dohot borunami nang di hamu sude Parboruonnami. Di son ro do hami pasahathon dengke sito-tio, asa sai tio ma parsaulian parhorasan di hita, tarlumobi di borunami na paima-ima haroan. Dengke simudur-udur, asa sai marudur-udur ma hamu tu dolok tu toruan, sai sahata saoloan. Dengke saur do on, asa sai saur ma hita leleng mangolu jala horas-horas. Dengke sahat ma on, asa sahat ma na uli na denggan, sai dipasahat Tuhanta ma pasu-pasu-Natu hita. Tung songon on pe dengke on, las ma rohamuna manjalo Botima.

(Masi jalangan, dung i hula hulal simatua mulak tu hundulanna hian)

7. Parhata ni Parboru

On pe di hamu Raja ni Parboruonnami! Nunga hupasahat hami be pangupaon dohot ulos tondi tu boru dohot helanami, mangihut dengke sitio-tio dohot simudur-udur tu hamu Parboruonnami Saonari hupasahat hami ma partingkian tu hamu, asa uduti hamu. Botima

8. Parhata ni Paranak

Gabe ma jala horas Raja ni hula hulanami! Nunga tung tangkas dipatuduhon hamu holong marboru i tu parumaennami. Asi ma roha ni Tuhanta, dipasaut ma sude angka tangiangmuna i. Rajanami, Raja ni Hula hula. Andorang so marsipanganon hita, jolo hupasahat hami ma nian juhut na tabo, na marsaudara laho pasangaphon hamu Rajanami. Botima.

9. Parhata ni Parboru

Na denggan angkup ni na uli Raja ni Boru. Nunga rade hami,

10. Hata Sidohonon ni Simatua ni Parumaen ditingki pasahat tudu-tudu ni sipanganon.

(Paranak, anak dohot parumaen borhat mandapothon tu hula hula, laho pasahathon na margoar ni sipanganon, jala didok ma hatana) Di hamu na huparsangapi hami, Hula hulanami. Tung so tarhasuhatan hami do songon dia balga ni holong na pinasahatmuna tu hami, lumobi ma tu parumaen dohot anaknami, manang boru dohot helamuna. Di son Raja ni Hula hula, hupasahat hami do tu hamu tudu tudu ni sipanganon, songon sombanami maradophon hamu. Asa sai tudu tudu ni na uli na denggan ma on di lanakhonta, nang di hita saluhutna. Songon i pe nuaeng sipanganon na hupasanat hami on, las ma rohamuna manjalo. Botima. 

(Paranak, hela, parumaen manjalang Hula hula, jala mulak muse tu hundulanna hian)

11. Parhata ni Paranak

Di hamu Amanta Raja dohot hamu Inang Soripada, parmanganonta sistem paresmanan do, masiantan di ibana be. Di hamu Raja ni Hula hulanami. Ala laho marsipanganon ma hita, ise ma sian hita sibahen tangiang laho mangan.

12. Parhata ni Parboru

Mauliate ma Raja ni Boru! Ninna rohanami, ala hamu do na parade sipanganon, sian hamu ma na mambahen tangiang laho mangan.

13. Parhata ni Paranak

Na denggan angkup ni na uli Rajanami. On pe Amanta Amani… ma mambahen tangiangta laho marsipanganon hita. Botima.

(Sibahen tangiang, laos manghatahon hata ni sipanganon)

Sititik marsigompa, golang pangarahutna,

Songon dia pe sipanganon natupa, godang ma pinasuna.

Marjomuk ma hita!

(Di tingki na marsipanganon, boru ni Paranak paradehon pisau, sangkalan dohot pining kosong. Boru ni Parboru manjalo paralatan i, jala diseati ma alang-alang, ate-ate dohot butuha raja, dungi dibagihon tu rombongan ni hula hula dohot dongan sahuta nang dohot angka raja na ginokhon)

14. Parhata ni Parboru

(Dung sae marsipanganon parhata ni Parboru manungkun partording ni tudu tudu ni sipanganonon):

Di hamu Raja ni Parboruonnami! Andorang so tapungka manghatai, nangkin nunga dipasahat hamu tudutudu ni sipanganon on tu hami. Na manungkun ma hami tu hamu, tarsongon dia ma partording ni on, Raja ni Boru. Songon i ma jolo sungkun-sungkunnami tu hamu. Botima.

15. Parhata ni Paranak

Olo ma tutu Raja ni Hula hula! Nunga tutu hupasahat hami tudu tudu ni sipanganon i tu hamu. Ninna rohanami, surung- surungmuna do i, Rajanami! Botima

16. Parhata ni Parboru

Molo songon i do pandokmuna, surung-surungnami do hape tudu tudu ni sianganon on. Mauliate ma dohononnami tu hamu Raja ni Borul. On pe di hamu Borunami, asa pasimpan hamu ma jolo tu ingananna, huhut pature hamu, asa lehon hamu annon tu uduranta na patut manjalo.

Di hamu Raja ni Borunami! Songon dia ma muse udut niang hataionta Raja ni Boru. Hupasahat hami ma tu hamu asa hamu ma na mangatur panghataionta. Botima

17. Hata Sidohonon tingki pasahat pasituak na tonggi tu hula-hula.

Parhata ni Paranak

Gabe ma jala horas Raja ni hula hula! Nunga tutu mardalan ulaonta dohot denggan. Eleknami nian tu Raja i, andorang so dipasahat hamu hata sigabe gabe, hata pasu-pasu rade ma hamu, asa ro hami pasahathon sipalas roha (batu ni sulang) dohot pasituak na tonggi, asa sai ro angka na tonggi di hita saluhutna. Botima.

18. Parhata ni Parboru

Na denggan angkup ni na uli Amangboru! Pasahat hamu ma, nunga rade hami.

19. Parhata ni Paranak

On pe borhat ma anaknami dohot parumaennami pasahathon sipalasroha ni hula hulanta dohot pasahathon pasituak na tonggi. (Anak dohot parumaen pasahathon amplop parjolo, i ma sipalas roha (batu ni sulang) tu natoras ni si parumaen. Dungi pe asa dilehon pasituak na tonggi tu sude rombongan Parboru).

On pe Rajanami, na mangido dope hami tu hamu, asa lehon hamu hata sigabe gabe dohot hata pasu-pasu tu hami saluhutna Parboruonmuna, tarlumobi tu anak dohot parumaennami.

20. Hata sigabe gabe / pasu-pasu sian Hula hula.

Parhata ni Parboru

Gabe ma jala horas Raja ni Borul Pasahatonnami do antong hata sigabe gabe, hata pasu-pasu dohot angka hata na uli tu hamu, Raja ni Boru! 

(Didompakhon tu rombongan Parboru). Di hita na marhaha maranggi, dohot borunami, ninna roha nian, na pasahathon hata sigabe gabe, hata pasu-pasu dohot angka hata na uli hata na denggan, sude ma hita. Alai tung sada pe na mandok hata, naung sahata ma hita disi. Jadi tarsongon on ma nian. Songon hata ni umpasa na mandok:

Sada silompa gadong, dua silompa ubi,

Tung salak pe na mandok hata, sude ma mandok na uli.

Sada ma sian boru, sada sian hita na namardongan tubu, baru tu suhut Parboru Parjolo ma sian boru, dung i diuduti sahalak sian hita na mardongan tubu, baru pe tu suhut Parboru Dung i annon baru pe tapaampuhon tu Raja ni Borunta. Beha rohanta. (Rombongan Parboru mandok), "Na denggan angkup ni na uli"

21. Hata sigabe gabe sian boru.

Maualiate godang ma tapasahat tu Tuhanta, ai ala asi dohot holong ni roha-Na boi hita pajumpang di bagasta na marampang na marjual on di bagasan hahipason dohot las ni roha. Jala tarlumobi ma muse, mandok mauliate ma hita tu Tuhanta, dibasa- basahon do di hita haroan sipaimaon di maennami. Onpe di anakniba, malo ho manjaga huhut manganju roha ni maen i. Ai molo di tingki sisongon on, tarsai adong do parubahan ni roha, Jaga, unang mangangkat angka na borat ibana. Denggan urus panganonna, asa sehat na di bagas bortian, sehat nang maen on. Di hope maen, pos ma roham di haroan na tapaima on, adong do hami, tarlumobi hula hulanta na sai tongtong na mangalehon semangat dohot na manangianghon ho. Sai martangaiang ho tu Tuhanta, asa Ibana mangurupi ho, asa hipas sorang haroan na tapaima, horas hita na nidapotna. Songon hata ni umpasa ma dohonon:

Sanjongkal urat niri, tolu jongkal urat ni singkoru,

Ulos mula gabe na pinasahat ni hula hulanta i tu hamu,

Saur ma i mangulosi anak dohot boru

Botima. Hatanami i hata sitambaan.

22. Hata sigabe gabe sian dongan tubu.

Tongtong ma hita mandok mauliate tu Tuhanta i, ai ndang tarhasuhatan asi dohot holong ni roha-Na di hita. Di papungu do hita di ari na uli, ari na denggan on marlas ni roha manjalo sibasa- basa-Na, i ma haroan na tapaima-ima di borunta. On pe Boru hasian, las ma roham manjalo sibasa-basa na sian Tuhanta i. Songon di tangiang pasu-pasunami di tingki tarpasu-pasu hamu, asa tibu hamu dililiti andorna, nunga dapot i nuaneng, las maroham, las ma rohanta. Songon hata ni umpasa ma dohonon:

Tubu ma lata di toru ni bunga-bunga,

Tubu ma di hamu anak na marsangap,

dohot boru na martua donganmuna saurmatua.

Ala ni i sotung uang olo marsak roham, manang mabiar di na managam haroan on ho Inang. Pos roham Inang, boru hasian, adong do hami ma sai manangianghon ho tu Tuhanta i, asa Ibana na mangurupi ho, dohot na mampargogoi ho di haroan na tapaima-ima i. Ho pe antong Inang, sai gogo martangiang tu Tuhanta, asa Ibana na patiurhon diparsorang ni haroan na tapaima-ima i. Sorang ibana so haribo-riboan. Horas na ro, horas na ni dapot. Di hamu pe Amang Hela, tongtong ma lehon hamu dorongan semangat tu Borunami on, asa pos rohana. Jala sabar hamu manganju Borunami, jala denggan urus hamu sipanganonna, asa sehat haroan na tapiama. Botima Hatangki hata sitambaan.

23. Hata sigabe gabe dohot pasu-pasu sian simatua ni anak

Tapuji ma Tuhanta, na mangalehon ari na uli, ari na denggan on, boi hita pajumpang di bagasan hahipason dohot las ni roha. Lumobi muse, marlas ni roha hita, ala dilehon Tuhanta do sibasa- basa-Na, i ma haroan na tapaima-ima di borunta. 

Di silas ni rohantai, Inang boru hasian, nunga hupasahat hami nangkin upa-upam di na managam haroan ho, i ma marhite indahan na las dohot dengke sitio-tio nang dohot sipanganon sinoloman ni roham boru hasian, asa tio ma parhorasan, parsaulian di ho boru hasian dohot di helanami pasu-pasuon ni Tuhanta. Nunga hupasahat hami ulos tondi manang ulos mula gabe, sai mangulosi daging dohot tondimuna ma i, suang songoni nang haroan na tapaima-ima pasu-pasuon ni Tuhanta. Laos nunga hupasahat hami tu hamu sude Parboruonnami dengke simudur-udur, asa sai marudur-udur hamu antong tu dolok tu toruan, jala sai masipaolo-oloan di bagas holong na sian Tuhanta i.

Pege sangkarimpang, ansimun sada holbung

Mangangkat rap tu ginjang, tu toru rap manimbung.

Dengke saur, dengke sahat, asa sahat ma na uli, sahat na denggan jala saur ma hita leleng mangolu sahat tu na saurmatua jala horas-horas. Songon hata ni natua-tua ma dohonon:

Andor hadungka ma togu-togu ni lombu,

Pengpeng saur matua ma hamu patogu-togu pahompu.

On pe Inang, boru hasian, pos ma roham, adong do hami hula hulam, dongan tubum, borum dohot angka dongan sahutam na laho mangalehon semangat dohot tangiang tu Tuhanta mangurupi ho, Inang hasian. Sai na urupan-Na do ho di gogo dohot hahipason. Horas haroan na laho sorang, horas hita na paimahon Songon i ma hatanami tu hamu Raja ni Parboruonnami.

Sahat-sahat ni solu, sahat ma tu bontean,

Sai leleng ma hita mangolu sahat tu parhorasan Panggabean

Botima.

24. Parhata ni Parboru

On pe di hamu Raja ni Borunami! Nunga be sude hami marliat-liat pasahat hata sigabe gabe dohot hata pasu-pasu na uli. Hupasahat hami ma tu hamu, asa ampuhamu Botima.

25. Hata pangampuon sian Paranak

Parhata ni Paranak

Gabe ma jala horas Rajanamil Ampuonnami ma tutu hata sigabe gabe, hata pasu-pasu, i ma hata na uli hata na dengan na pinasahatmuna tu hami.

(Didompakhon tu horong ni Paranak). Di hita rombongan Paranak, na mangampu do hita di hata sigabe gabe dohot hata pasu-pasu na ni pasahat ni Raja ni Hula hulanta tu hita. Jadi ninna roha nian. parjolo ma hamu Boru, dung i dongan sahuta, laos diuduti na mardongan tubu, baru pe suhut Paranak, anak dohot parumaen. Sahalak ma songon utusan sian ganup horong, songon hata ni Sada Umpasa:

Sada si lompa gadong, dua si lompa ubi,

Sahalak pe na mandok hata, sude ma hita dapotan uli

On pe hupasahat hami ma parjolo tu Borunami.

26. Hata pangampuon sian Boru.

Mauliate ma tapasahat tu Tuhanta, ala marhite asi dohot holong ni roha-Na boi pajumpang hita di bagasan hahipason dohot las ni roha. Mauliate do dohononnami nang tu hamu Raja ni Hula hula ni Hula hulanami, di siala haroromuna na pasahathon ulos tondi manang ulos mula gabe, nang dohot upa-upa marhite indahan na las dohot dengke sitio-tio tu Nantulang na poso dohot tu Paramaannami. Sude hata sigabe gabe dohot hata pasu-pasu na pinasahtmuna tu hami, tarlumobi tu Nantulang na poso dohot Paramaannami, sai manjangkon ma pardagingon dohot partondion, tuak ma di abara, ampe di parsalimbubuan nasida pasu-pasuon ni Tuhanta.

Ndang tarbalos hami uli basa na pinasahatmuna i tu hami, sai sian Tuhanta ma jalo hamu balosna marlipat ganda. Songon i ma jolo pangampuon sian hami Boru. Botima

27. Hata pangampuon sian Dongan Sahuta.

Sai tongtong do mandok mauliate hita tu Tuhanta Parasi roha bolon i, ai didongani do hita di ulaonta silas ni roha di jabu na marampang na marjual on. Mauliate do dohononnami tu hamu hasuhutonnami, na manggokhon huhut manjou hami dongan sahutamuna asa dohot hami mangadopi haroro ni Hula hulanta di na pasahat ulos tondi dohot upa-upa ni Inanta na paima haroan dohot Amanta i. Las ni roha ni hasuhuton, laos tong do dohot hami dongan sahutamuna marlas ni roha. Songon hata ni umpasa:

Poltak bulan tula, si raja manggule,

Molo marlas ni rona hasuhuton, dongan sahuta pe dohot mahulae

On pe sidohononnami, di na mangampu hata ni Hula hulanta, sai manjangkon ma pardagingon dohot partondion di hata pasu-pasu dohot hata sigabe gabe na pinasahatmuna tu hami, tarlumobl tu inanta na paima haroan di pasu-pasu Tuhanta. Botima.

28. Hata pangampuon sian Dongan Tubu.

Tapuji ma Tuhanta na sangap na marmulia i. Marhite asi doho holong ni roha-Na dilehon do hahipason ni daging dohot tondi di parpunguanta di silas ni roha sadari on, di na ro hamu Hula hulanami pasahat ulos tondi tu parumaennami. Jala mauliate ma hupasahat hami tu hamu Hula hulanami, di uli basamuna na pasahathon ulos tondi, manang na didok ulos mula gabe. Suang songon i do nang dohot angka hata pasu-pasu, hata tangiang nang hata poda na dipasahat hamu tu hami, tarlumobi tu parumaennami dohot anaknami. Sai tuak ma i di abara, ampe di parsalimbubuan nasida. Sai manjangkon ma pardagingon dohot partondion ni parumaennami dohot anaknami. Uli basamuna i Rajanami, ndang tarbalos hami i, sai sian Tuhanta ma jalo hamu balosna mariompit ganda. Botima.

29. Hata pangampuon sian suhut Paranak

Tapuji ma Goar ni Tuhanta Parasi roha bolon i. Marhite na didongani asi ni rohani Tuhanta do asa denggan marture ulaonta silas ni roha sadari on. Mauliate ma hupasanat hami tu hamu Amanta Raja dohot Inanta Soripada, dongan sabutuhanami, boru berenami, dohot dongan sahutanami, di haradeon ni rohamuna rampak hamu dohot inanta soripada mangadopi ulaon silas ni rohanta sadari on. Molo tung hurang pe panjalonami di hamu, marpanganju ma hamu di hami. Tangkas do huboto hami, ala ni pangurupionmuna do asa saut ulaonta on. On pe mauliate ma di hamu Amang Raja dohot hamu Inang Soripada.

Jala mandok mauliate do hami tu hamu Raja ni Hula hulanami, di uli basamuna na pasahathon ulos tondi tu parumaen dohot anaknami, suang songon i dohot indahan na las dohot dengke upa-upa, nang angka hata pasu-pasu dohot hata sigabe gabe tu hami, tarlumobi tu parumaen dohot anaknami. Sai asi ma roha ni Tuhanta, sai manjangkon ma pardagingon dohot partondionnami di angka hata na uli hata na denggan na pinasahatmunai tu hami. Songon hata ni natua-tua ma dohononnami :

Naung sampulu pitu, jumadi sampulu alu,

Hata pasu-pasumuna i, sai huampu hami ma i di tonga jabu.

Uli basamuna i Rajanami, ndang tarbalos hami i, sai sian Tuhanta ma jalo hamu balosna marlipat ganda Di tangiangnami, sai dilehon Tuhanta ma di hamu hahipason dohot ganjang ni umur. Botima

30. Hata mangampu sian anak/parumaen.

Mauliate ma hupasahat hami tu Tuhanta, na mangalehon hahipason di hita. Suang songon i mandok mauliate do hami tu hamu Hula hulanami, naung pasahathon upa-upa marhite indahan las dohot dengke sitio-tio, ulos tondi, manang ulos mula gabe, nang angka hata pasu-pasu dohot hata sigabe gabe tu hami. Sai asi ma roha ni Tuhanta, sai disahaphon ma i tu hami, tuak ma di abara, ampe di salimbubunami. Hata ni situa-tua ma dohonon:

Turtu ma ninna anduhur, tio ma ninna lote,

Hata pasu-pasumuna i Rajanami, sai unang muba, unang muse

Uli basamuna Rajanami, ndang tarbalos hamii, sai sian Tuhanta ma jalo hamu balosna marlipat ganda. Botima.

31. Parhata ni Paranak

Di hamu Raja ni Hula hulanami! Nunga ris be hami mangampu hata sigabe gabe, hata pasu-pasu na pinasahatmuna tu hami. Songon hata ni umpasa ma dohononnami:

Naung sampulu pitu, jumadi sampulu alu,

Sude hata na uli na pinasahamuna Rajanami,

huampu hami ma di tonga jabu.

Di hata panimpulion ni ulaonta sadarion, dohonon ma hata ni umpasa ni situa-tua:

Binanga ni Bangkara, tu binongkak ni Tarabunga,

Di balian ndang marmara, di huta pe ndang mahua.

Tu sanggar ma amporik, tu lubang ma satua, on

Sinur ma na pinahan, gabe ma na ni ula

Sahat-sahat ni solu, sai sahat tu bontean,

Sai leleng ma hita mangolu, sahat tu parhorasan tu Panggabean

Pangidoannami Rajanami, sian hamu Hula hula i ma mambahen tangiang panutup di ulaonta sadari on. Botima.

32. Parhata ni Parboru

Gabe jala horas Raja ni Boru! (Didompakhon tu amanta sintua) On pe Amang Sintua, bahen ma endenta, jala laos tutup ma dohol tangiang. Botima.

(Dung saematangiang, marhehe na uli, masijalangan jala di tingki i ma dilehon jambar na dibungkusi nangkin)